იქნება ზეიმი, სრულად უსაფრთხო გარემოს უწყებები გააკონტროლებენ - კალაძე ნაძვის ხის ანთებაზე

"იქნება სადღესასწაულო განწყობა, ზეიმი, სრულად უსაფრთხო გარემო, რასაც შესაბამისი უწყებები გააკონტროლებენ. სახელმწიფო ინსტიტუტები ძლიერია და ვითარება სრულად კონტროლდება", - განაცხადა მან ფეისბუქლაივში, სადაც, ასევე უპასუხა, პრეზიდენტ სალომე ზურაბიშვილის განცხადებას, რომელმაც თქვა, რომ პროვოკაციაა ხვალ საღამოს ნაძვის ხის რუსთაველზე, პროტესტის ადგილზე ანთება. პრეზიდენტმა თბილისის მერს ღონისძიების სხვა ტერიტორიაზე გადატანა შესთავაზა.

"დღეს საღამოს მოვისმინეთ სალომე ზურაბიშვილის განცხადება, რომელმაც ხვალინდელ საზეიმო ღონისძიებას უწოდა "რაღაც უაზრო პროვოკაცია" პირდაპირ დაგვემუქრა, რომ თურმე ამაზე პასუხი უნდა ვაგოთ. ზოგადად, რა პროვოკაციაზე საუბრობს სალომე ზურაბიშვილი, ალბათ, მან თავად უკეთ იცის, რადგან წარმოუდგენელია ვინმე ჭკუათმყოფელს აზრად მოუვიდეს პროვოკაციის მოწყობა ღონისძიებაზე, რომელიც განკუთვნილია ბავშვებისთვის.

მინდა, პირველ რიგში, ბოდიში მოვუხადო ჩვენს მოსახლეობას. მე ამაზე არასდროს მისაუბრია და ახლა თავს ვაძლევ უფლებას... სწორედ "ქართული ოცნების" ძალისხმევით აღმოჩნდა ეს ქალი იქ, სადაც იმყოფება, რომელიც სიძულვილით, ბოღმით ემსახურებოდა და ემსახურება არა საქართველოს, არამედ, უცხო ძალებს. მადლობა ღმერთს, 2025 წელს არა ის, არამედ, ახალი პრეზიდენტი მოულოცავს საქართველოს მოსახლეობას", - თქვა კალაძემ.

13 დეკემბერს, საღამოს, ორბელიანების სასახლეში გამართულ ბრიფინგზე საქართველოს პრეზიდენტმა განაცხადა, რომ რუსთაველის გამზირზე 14 დეკემბერს თბილისის მერის მიერ მთავარი ნაძვის ხის ანთება - მაშინ, როდესაც 2 კვირაზე მეტია, იქ საპროტესტო დემონსტრაციები იმართება, - „პროვოკაციაა“.

სალომე ზურაბიშვილმა კახა კალაძეს მოუწოდა, ორბელიანის მოედანზე „მოაწყოს ის ღონისძიება, რასაც პარლამენტთან აპირებდა“. 14 დეკემბერსვე გეგმავს „ქართული ოცნება“ ახალი პრეზიდენტის არჩევას.

ქალაქის ნაძვის ხე რუსთაველის გამზირზე, პარლამენტის შენობის წინ დგას - ამ ადგილზე ბოლო 15 დღეა, ათასობით ადამიანი იკრიბება „ქართულ ოცნებაში“ მიღებული გადაწყვეტილების გასაპროტესტებლად და ახალ არჩევნებს ითხოვს.

„ეს აშკარა პროვოკაციაა, რამეთუ ორი კვირაა უკვე, იმ ადგილას იმ დროს უწყვეტად არის გამოხატული პროტესტი და ხვალ რადგანაც იმართება პარლამენტში პაროდია, უთუოდ იქნება ძალიან დიდი პროტესტი“, - განაცხადა 13 დეკემბერს სალომე ზურაბიშვილმა ბრიფინგზე.

პრეზიდენტის თანახმად, „ექიმები ამბობენ, რომ რუსთაველზე შენობების ფასადები და ხეები გაზითაა გაჟღენთილი და სასურველი არ არის ბავშვების მოყვანა“.

„მინდა გავაფრთხილო ქალაქის მერი, რომ მისი ეს პროვოკაცია არაფერს არ გამოიწვევს, რადგან ქალაქში პროტესტი ხვალაც იქნება და იქნება მშვიდობიანი“, - განაცხადა პრეზიდენტმა.

მან მოვლენების შესაძლო განვითარებაზე პასუხისმგებლობა კახა კალაძეს დააკისრა.

მე-16 დღეა, რუსთაველის გამზირსა და თბილისის ქუჩებში საპროტესტო დემონსტრაციები იმართება, რაც ირაკლი კობახიძის განცხადებას მოჰყვა ევროკავშირთან 2028 წლამდე მოლაპარაკებების გახსნის საკითხის დღის წესრიგში არდაყენებასთან დაკავშირებით.

აქცია დაგეგმილია შაბათ საღამოსაც.