ნეთანიაჰუ ამბობს, რომ ისრაელი გააგრძელებს ამერიკასთან ერთად, ცეცხლის შეწყვეტის მოლაპარაკებაზე მუშაობას

ისრაელის გუნდს შეხვედრები ჰქონდა, რათა განეხილა ამერიკის მიერ შეთავაზებული ლიბანთან ცეცხლის შეწყვეტის წინადადებები და გააგრძელებენ დისკუსიებს მომდევნო დღეებში. ამის შესახებ, პარასკევს, 27 სექტემბერს, ისრაელის პრემიერ-მინისტრმა ბენიამინ ნეთანიაჰუმ განაცხადა. მან დასძინა, რომ ის აფასებს ამერიკის ძალისხმევას.

"ჩვენი გუნდები შეიკრიბნენ [ხუთშაბათს, 26 სექტემბერს], რათა განეხილათ ამერიკის ინიციატივა და ის, თუ როგორ მივაღწიოთ საერთო მიზანს - ადამიანების უსაფრთხოდ დაბრუნებასს სახლებში. ჩვენ გავაგრძელებთ ამ დისკუსიებს უახლოეს დღეებში", - თქვა მან განცხადებაში.

ეს კომენტარი მას შემდეგ გაკეთდა, რაც ისრაელის საგარეო საქმეთა მინისტრმა ისრაელ კაცმა, ხუთშაბათს, 26 სექტემბერს განაცხადა, რომ ჩრდილოეთში ცეცხლის შეწყვეტა არ იგეგმება. ისრაელ-ლიბანის საზღვარზე, ქვეყნის ჩრდილოეთით, ისრაელის თვითმფრინავები, ბოლო ათწლეულის განმავლობაში, ირანის მიერ მხარდაჭერილი "ჰეზბოლას" წინააღმდეგ ყველაზე მძიმე დაბომბვას ახორციელებენ.

ხუთშაბათს, მას შემდეგ რაც ნეთანიაჰუ ნიუ-იორკში, გაეროს გენერალურ ასამბლეაზე დასასწრებად გაემგზავრა, მისმა ოფისმა გაავრცელა განცხადება, რომელშიც ნათქვამია, რომ პრემიერ-მინისტრმა ისრაელის ჯარს უბრძანა, რომ სრული ძალით გააგრძელონ ბრძოლა ლიბანში.