პოლიციელებმა აქციაზე სასტიკად ნაცემ ახალგაზრდას ნახმარი წინდა მისცეს სისხლის შესაჩერებლად – უფლებები საქართველო

7

აქციაზე სასტიკად ნაცემ ახალგაზრდას, რომელიც წუხელ სასამართლო სხდომაზე შეუძლოდ გახდა, ოპერაცია ჩაუტარდა – უფლებები საქართველო წერს, რომ პოლიციელებმა დაზარალებულს ნახმარი წინდა მისცეს სისხლის შესაჩერებლად.

განცხადების თანახმად, 30 ნოემბერს აქციაზე დაკავებული და ნაცემი ავთანდილ ტიტვინაძე, რომელსაც ჰქონდა ღია ჭრილობა და ცხვირის ძვლების მოტეხილობა, აწუხებდა ძლიერი ტკივილები, იზოლატორის ექიმება არ გადაიყვანეს კლინიკაში. 2 დეკემბრის 00:30 საათზე მისი სასამართლო პროცესი მიმდინარეობდა, რა დროსაც იგი შეუძლოდ გახდა.

სასამართლოს ეზოში მისულმა სასწრაფო დახმარების ბრიგადამ დაკავებული პირის კლინიკაში გადაყვანა მანამ ვერ შეძლო, სანამ მოსამართლემ ფორმალურად არ გახსნა სხდომა, გამოყო ტიტვინიძის საქმე და გადადო მისი განხილვა.

ავთანდილ ტიტვინიძეს ღუდუშაურის კლინიკაში გადაყვანის შემდეგ, გამოკვლევებით დადგინდა, რომ დაკავებისას მასზე განხორციელებული ძალადობის შედეგად, ჰქონდა ცხვირის ზედაპირის ღია ჭრილობა და ცხვირის ძვლების მოტეხილობა. ჩაუტარდა ოპერაცია, კერძოდ – გაიკერა ჭრილობა და დახურული გზით მოხდა ცხვირის ძვლების ფიქსაცია.

ავთანდილ ტიტვინიძე ამბობს, რომ რამდენიმე სპეცრაზმელი სასტიკად გაუსწორდა და ხელკეტით გაუტეხა ცხვირი. ცხვირიდან სდიოდა სისხლი და ითხოვდა ექიმის დახმარებას, პოლიციის თანამშრომლებმა კი ნახმარი წინდა მიაწოდეს და იმით შესთავაზეს სისხლის შეჩერება”- წერს ორგანიზაცა. 

ავთანდილ ტიტვინიძის საქმის განხილვა 5 დეკემბრისთვის გადაიდო. მის ინტერესებს სასამართლოში “უფლებები საქართველო” იცავს