რატომ „გააცოცხლა“ ირაკლი კობახიძემ გერმანიაში „თვალს მოფარებული“ ლევან იზორია

9

ირაკლი კობახიძის თქმით, იქმნება სამთავრობო კომისია, რომელიც 4 წელი იმუშავებს საუნივერსიტეტო რეფორმაზე. კომისიის მდივანი თავდაცვის ყოფილი მინისტრი, ლევან იზორია იქნება. ეს ის იზორიაა, რომლის მისამართითაც კორუფციისა და მრავალი მილიონის გაფლანგვის საკითხზე უამრავი კითხვა არსებობს, რის შესახებაც „ალია“ ბევრს წერდა და რომელზე პასუხის გაცემის ნაცვლად, „ოცნებამ“ იზორია გერმანიაში ელჩად  გადაიყვანა, ვითომ თვალს მოაფარა და ამით სკანდალის ჩახშობას შეეცადა.

„გვაქვს ძალიან მნიშვნელოვანი ამბიციური ამოცანა, საუნივერსიტეტო რეფორმის მიმართულებით. ჩვენ ვქმნით სამთავრობო კომისიას, რომელიც იმუშავებს საუნივერსიტეტო რეფორმაზე. 4-წლიან პერსპექტივაში ჩვენ თვისებრივად უნდა გარდავქმნათ საუნივერსიტეტო სისტემა, უმაღლესი განათლების სისტემა ჩვენს ქვეყანაში. დღეს არ არის დამაკმაყოფილებელი უმაღლესი განათლების ხარისხი ჩვენს ქვეყანაში. და რესურსები არის ძალიან დიდი ამ მიმართულებით. მაქსიმალურად უნდა ავითვისოთ ყველა რესურსი, იმისათვის, რომ 4 წელიწადში ჩვენ მივიღოთ თვისებრივად განახლებული სისტემა. თავისუფლად არის შესაძლებელი ის, რომ 4 წელიწადში ქართველმა სტუდენტმა საქართველოში მიიღოს ზუსტად იმ ხარისხის განათლება, რა ხარისხითაც ის იღებს განათლებას ევროპულ ქვეყნებში. ამისათვის უნდა დაისახოს კონკრეტულად  გაწერილი გეგმა და ამაზე იმუშავებს სამთავრობო კომისია, რომელსაც ვუხელმძღვანელებ მე, მოადგილე იქნება განათლების მინისტრი, ბატონი ალექსანდრე წულაძე და ამ კომისიის მდივანი იქნება ბატონი ლევან იზორია, რომელიც გახლავთ პრემიერ-მინისტრის მრჩეველი განათლებისა და მეცნიერების საკითხებში. აქაც არც ერთი დღე და არც ერთი კვირა არ უნდა ჩავაგდოთ. ინტენსიური მუშაობა დაგვჭირდება იმისათვის, რომ 4 წლის თავზე ჩვენ სრულად მივაღწიოთ დასახულ მიზანს“, – განაცხადა კობახიძემ.