“რა ჯანდაბის პოლიტიკოსები არიან, მუდმივად სხვებისგან თუ ითხოვენ რჩევებს და გეგმებს?”- ქეთევან ენუქიძე

ქოცები არ ამბობენ, რომ პუტინი თავს გვესხმოდა და ბიძინამ გადაგვარჩინა. ისინი ამბობენ, რომ გლობალური ომის პარტია აიძულებდა ომში ჩართვას და მეორე ფრონტის გახსნას.

ამ დროს, ასეც ვერ დავადგინეთ, რა არის ეს გლობალური ომის პარტია და ვერც იძულების მტკიცებულება ვნახეთ.

ეს ორი X მხოლოდ დაცინვის და ეთერებში თავმომწონე მჭევრმეტყველების საგნად ჩარჩა.

ყველაფერს თავი რომ დავანებოთ, კობახიძე მუდმივად გაიძახის, რომ უკრაინის სასარგებლო არაერთი ნაბიჯი გადადგა.

კითხვა მაინც დაესვა ვინმეს – როცა ამას აკეთებდა, პუტინის და ომის მაშინ რატომ არ ეშინოდა?

ბრიფინგზე თქვა ეს და, ჟურნალისტებმა, ნაცვლად იმისა, რომ 25 წუთიანი ჩამონათვალი დეტალურად განეხილათ, სივრცე დატოვეს. მერე კი მთელი ფეისბუქი ბედნიერი დაათრევდა ჟიჟილაშვილის 11-წუთიან მონოლოგს, რომელიც უბრალო გულისფხანა იყო და, ვინც მთელი საათ-ნახევარი ნახა, მიხვდებოდა, რომ არაფერი მომხდარა იქ ისეთი, მშვიდი გულისფხანის მიზეზი რომ გვქონოდა.

სამაგიეროდ, კრეწიული პოსტები დაიყარა “კულტურა/ზრდილობის” და IQ -ს თემაზე.

გააყალბეს და იმიტომ მოიგესო.

კი, გააყალბეს, მაგრამ ეს ყბადაღებული მშვიდობა რომ არა, ამდენს გაყალბებითაც ვერ გაქაჩავდნენ.

რეგიონებში გადით და ნახეთ, გაუყალბებლადაც როგორ მიაღწიეს სასურველს.

თუმცა, გაუსვლელადაც იცით ყველამ!

მე თუ მკითხავთ, ის კოშმარული ბანერები რომ გამოფინეს, მაშინვე უნდა გაეპროტესტებინათ არჩევნები!

რელობა არის ასეთი:

გაყალბებულ არჩვენებზე ხალხი არ რეაგირებს, რადგან სხვანაირი არჩევნები არც უნახავს და, დღეს თუ ქუჩაში აქციებია, აქციებია არა გაყალბების, არამედ კობახიძის განცხადების გამო!

დღეს თუ ითხოვენ არჩვენებს, ითხოვენ იმიტომ, რომ ხელისუფლებამ ღიად და დაუფარავად თქვა ის, რასაც აქამდეც ამბობდა, მაგრამ მოსასმენად არავის ეცალა.

რა გვექნაო?

ჯერ ერთი, რა ჯანდაბის პოლიტიკოსები არიან, მუდმივად სხვებისგან თუ ითხოვენ რჩევებს და გეგმებს?

მეორე – არჩევნების წინ უნდა ემუშავათ – კარდაკარ, დღე და ღამე, ჯგუფებთან პროფესიული ნიშნით, სოციალური ნიშნით, ინტერესების გათვალისწინებით…

არ გეტყვით, სად უნდა გაიკვეხოთ ბანძი ტრენინგები, დაბეჭდილი პრიალა ბუკლეტებით და პარტიისდროშებიანი კალმებით!

და ნუ მომიყვებით ზღაპრებს, როგორ ხდება ხოლმე ნაჩვევი წესებით მუშაობა!

თითქმის ათი წელია ვუყურებ და ვხედავ, რას ნიშნავს ეს “მუშაობა”. “კვლევა” და ა. შ.

მთელი იმედები მუდმივად დაკავშირებული იყო უცხოეთის რეაქციაზე და ქოცების შეცდომებზე!

პოლიტიკური ელიტა კი ამასობაში ჩამოყალიბდა საკუთარ სივრცში ჩაკეტილ მარგინალურ, უიდეო, უპლატფორმო და ეთერებში მოკეკლუცე ჯგუფად, რომელიც მოგზაურობს ერთი პარტიიდან მეორეში, ერთი ჯიბიდან მეორში; ბეჭდავს და აკოპირებს უკვე არსებულს, რადგან პირველი ათეული ყველა მანამდე არსებულში არ ეყო. მერე გადაკოპირებულიდან ქმნის კოალიციებს და არის ერთი ტაშიკუკური!

მეტსაც გეტყვით:

ჯაფარიძის ეს მორიგი გამოსროლილი (ჩემი სამეზობლოს ბირჟაზეც არ მინახავს, ვინმე ასე არახუნებდეს სიტყვებს) და მის გარშემო ატეხილი ამბავიც კი მთავარი კითხვიდან აქცენტის გადატანის მცდელობა მგონია: ბოლო-ბოლო, როდის გაეცემა პასუხი ხაზარაძის მიერ დასმულ კითხვას?