“როგორც კი მოადუნებთ ყურადღებას საზოგადოება “პირველი არხის” მიმართ, ეს არხი ყოველთვის იყო, არის და სამწუხაროდ, იქნება ყოველთვის ხელისუფლების ინტერესი” – ვასილ ივანოვ-ჩიქოვანი

,,საზოგადოებრივი მაუწყებლის” შენობასთან საპროტესტო აქცია გაიმართა პირდაპირი ეთერის მოთხოვნით. გამართული მოლაპარაკებების შემდეგ ,,საზოგადოებრივმა მაუწყებელმა” ეთერი დაუთმო საპროტესტო აქციების მონაწილე საზოგადოებისათვის ცნობად სახეებს, სადაც, სავარაუდოდ, დაუგეგმავად სიტყვით გამოვიდა ,,პირველი არხის” მოქმედი წამყვანი, ვასილ ივანოვ-ჩიქოვანი:

,,არაჩვეულებრივი ეთერია, თუმცა იგი კიდევ ერთხელ ადასტურებს, რომ საზოგადოებრივი მაუწყებლის ახალი და მიმდინარე ამბების ბლოკის სარედაქციო პოლიტიკა ვერ პასუხობს იმ საზოგადოებას და მოთხოვნას, რომელიც არის საზოგადოებაში.

ეს ეთერი დღეს რომ ყოფილიყო ჩვენი ორგანიზებული, ეს იქნებოდა ის, რომ საზოგადოებრივი მაუწყებლის ახალი და მიმდინარე ამბების ბლოკის სარედაქციო პოლიტიკა პასუხობს საზოგადოების მოთხოვნას.

თუმცა, მადლობა იმ საზოგადოებას, რომელმაც მიაქცია ყურადღება საზოგადოებრივ მაუწყებელს, მოითხოვა ეს ეთერი და ეს ეთერი შედგა.

ის თუ რატომ არ პასუხობს დღეს ახალი და მიმდინარე ამბების ბლოკის სარედაქციო პოლიტიკა იმ მოთხოვნას, რომელიც საზოგადოებაში არის, ამის ახსნაც ბევრია.

საზოგადოებამ დაუშვა ის, რომ პარტია ,,ქართული ოცნების” თავმჯდომარის მოადგილე, მას შემდეგ, რაც ჯანმრთელბის მდგომარეობის გამო არგუმენტით დატოვა თანამდებობა, შემდეგ საქართველოს პარლამენტმა სრულიად ლეგიტიმურად და კანონის დაცვით აირჩია ,,საზოგადოებრივი მაუწყებლის” სამეურვეო საბჭოს თავმჯდომარედ – ეს ადამიანი არის ვასილ მაღლაფერიძე.

ის, თუ აქამდე ფართოდ რატომ არ ისმოდა საზოგადოების ხმა, საზოგადოებრივ მაუწყებელზე, მათ შორის, არის საზოგადოების ბრალი, რომელიც ამ მაუწყებელს ყურადღებას არ აქცევს. როგორც კი მოადუნებთ ყურადღებას საზოგადოება ,,პირველი არხის” მიმართ, ეს არხი ყოველთვის იყო, არის და სამწუხაროდ, იქნება ყოველთვის ხელისუფლების ინტერესი. ასე თუ ისე, ძალით თუ არაძალით, ყოველთვის ეს ხელისუფლება და ძალაუფლება მოახერხებს საკუთარი ინტერესის გატარებას თქვენს არხზე, ,,საზოგადოებრივ არხზე”. ეს არის და ეს, რისი თქმაც მინდოდა, – განაცხადა ვასილ ივანოვ-ჩიქოვანმა.

ავტორი
ნინი ხიჯაკაძე