ტუსკის თქმით, რუსეთი თვითმფრინავებში ტერაქტებს ამზადებდა მთელს მსოფლიოში

პოლონეთის პრემიერ-მინისტრმა დონალდ ტუსკმა განაცხადა, რომ რუსეთის სადაზვერვო სამსახურები ამზადებენ ტერაქტების სერიას მსოფლიოს სხვადასხვა ავიახაზების თვითმფრინავებზე. ამის შესახებ მან ოთხშაბათს უკრაინის პრეზიდენტ ვოლოდიმირ ზელენსკისთან შეხვედრაზე ისაუბრა, იუწყება Politico.

„მე შემიძლია მხოლოდ დავადასტურო, რომ რუსეთი გეგმავდა საჰაერო ტერორისტულ აქტებს არა მხოლოდ პოლონეთის, არამედ ავიახაზების წინააღმდეგ მთელს მსოფლიოში“, - განაცხადა ტუსკმა. მან დეტალები არ დააკონკრეტა.

The New York Times-მა ცოტა ხნის წინ დაწერა, რომ აშშ-ის დაზვერვამ გააფრთხილა თეთრი სახლი, რომ რუსეთის სადაზვერვო სამსახურები გეგმავდნენ ასაფეთქებელი მოწყობილობების დამონტაჟებას აშშ-ში მიმავალ სატვირთო თვითმფრინავებზე. თეთრმა სახლმა, გაზეთის ცნობით, გააფრთხილა კრემლი ასეთი ოპერაციის შეჩერების აუცილებლობის შესახებ.

მოსკოვს ადრე არაერთხელ სდებდნენ ბრალს ევროპის სატრანსპორტო ინფრასტრუქტურის საბოტაჟში და GPS სიგნალების დაბლოკვაში. რამდენიმე ქვეყანა ამ ქმედებებს მოსკოვის მიერ წარმოებულ ჰიბრიდულ ომს უკავშირებს, აღნიშნავს Politico.

შარშან აპრილში ჩეხეთის ტრანსპორტის მინისტრმა მარტინ კუპკამ განაცხადა, რომ რუსეთს „ათასობით მცდელობა“ ჰქონდა, თავს დასხმოდა ევროპულ რკინიგზებს მას შემდეგ, რაც უკრაინის წინააღმდეგ სრულმასშტაბიანი ომი დაიწყო. კრემლის პრესმდივანმა დიმიტრი პესკოვმა ბრალდებებს უსაფუძვლო უწოდა.

გასული წლის ბოლოს რუსეთს ბრალი დასდეს ყაზახეთში აზერბაიჯანის ავიახაზების თვითმფრინავის ჩამოვარდნაში მონაწილეობაში. თვითმფრინავი ბაქოდან გროზნოში მიფრინავდა 25 დეკემბერს. მასში მყოფი 67 ადამიანიდან 38 დაიღუპა. გამოძიება გრძელდება, მაგრამ ავიაკატასტროფის ძირითადი ვერსია არის გროზნოს ცაზე საზენიტო რაკეტის დამრტყმელი ელემენტების მიერ ფიუზელაჟის დაზიანება.

აზერბაიჯანის პრეზიდენტმა ილჰამ ალიევმა განაცხადა, რომ კატასტროფაზე პასუხისმგებლობა „რუსეთის ფედერაციის წარმომადგენლებს ეკისრებათ“. მან რუსეთს დანაშაულის აღიარება და დამნაშავეების დასჯა მოსთხოვა. რუსეთის პრეზიდენტმა ვლადიმირ პუტინმა ბოდიში მოიხადა აზერბაიჯანული თვითმფრინავის ჩამოვარდნის გამო, მაგრამ პასუხისმგებლობა არ უკისრია.

აზერბაიჯანული ავიახაზების ჩამოვარდნასთან დაკავშირებით გაიხსენეს 2014 წელს მალაიზიის ავიახაზების რეისი MH17-ის კატასტროფა დონბასის ცაში, პრორუსი სეპარატისტების მიერ კონტროლირებად ტერიტორიაზე, რასაც 298 ადამიანი ემსხვერპლა. რუსეთს ჯერაც არ უღიარებია თავისი დანაშაული MH17 ტრაგედიაში.