უკრაინა ბაიდენის ადმინისტრაციისგან კიდევ 6 მილიარდ დოლარამდე დახმარებას მიიღებს

თეთრი სახლი პრეზიდენტ ბაიდენის უფლებამოსილების დასრულებამდე რუსეთთან თავდაცვით ომში მყოფი უკრაინისთვის მხარდაჭერის გაძლიერებას ცდილობს. 30 დეკემბერს შეერთებულმა შტატებმა უკრაინის დასახმარებელი სამგანზომილებიანი პაკეტის შესახებ გამოაცხადა.

თეთრი სახლის მიერ ორშაბათს გამოქვეყნებულ განცხადებაში ნათქვამია, რომ დახმარების პაკეტში შედის დამატებით 1.25 მილიარდი დოლარის ღირებულების აღჭურვილობა უკრაინის სამხედრო ძალებისთვის და 1.22 მილიარდი დოლარის მოცულობის უკრაინის უსაფრთხოების დახმარების ინიციატივა.

თეთრი სახლის განცხადებიდან რამდენიმე საათის შემდეგ, სახელმწიდო ხაზინამ უკრაინისთის ცალკე 3,4 მილიარდის გამოყოფის შესახებ გამოაცხადა, რომელიც პირდაპირ საბიუჯეტო მხარდაჭერისთვისაა გათვალისწინებული.

ამ დახმარების შესახებ გამოცხადდა მას შემდეგ, რაც უკრაინის პრეზიდენტმა ვოლოდიმირ ზელენსკიმ თქვა, რომ ვაშინგტონი მზად იყო ომით დაზარალებული მისი ქვეყნის შეიარაღებული ძალების მხარდაჭერის შესახებ „მნიშვნელოვანი გადაწყვეტილება“ გამოექვეყნებინა.

მიუხედავად დაპირებისა, რომ მხარდაჭერის გაძლიერება გაგრძელდება, სავარაუდოდ ეს პაკეტი ბოლოა, რომელსაც ბაიდენის ადმინისტრაცია გასცემს. ანალიტიკოსთა ნაწილის აზრით, ბაიდენის ადმინისტრაცია შიშობს, რომ არჩეული პრეზიდენტი დონალდ ტრამპი უკრაინისთვის იარაღის მიწოდებას მნიშვნელოვნად შეამცირებს.

„ჩემი მითითებით, შეერთებული შტატები გააგრძელებს დაუღალავად მუშაობას, რათა თანამდებობაზე დარჩენილი დროის განმავლობაში, ამ ომში უკრაინის პოზიცია გააძლიეროს“, - განაცხადა ჯო ბაიდენმა.

უკრაინის თავდაცვის მინისტრმა რუსტემ უმეროვმა 29 დეკემბერს თქვა, რომ კიევმა დანიისგან, საფრანგეთისგან და ლიეტუვისგან, უკრაინის თავდაცვითი მრეწველობის დაფინანსებაში დასახმარებლად დამატებით 156 მილიონი დოლარი მიიღო.

იმავდროულად, გერმანიის საგარეო საქმეთა მინისტრმა ანალენა ბაერბოკმა თქვა, რომ არ მოელის, რომ ბერლინში შემდგომმა მთვრობამ, უკრაინა რუსეთის წინააღმდეგ ომში „მიატოვოს“. 23 თებერვალს გერმანიაში ვადამდელი საპარლამენტო არჩევნებია დაგეგმილი

უკრაინისთვის მიწოდებული დახმარების მოცულობის კუთხით, გერმანია მხოლოდ ვაშინგტონს ჩამორჩება, თუმცა კანცლერი შოლცი კიევისთვის მძიმე შეიარაღების მიწოდებისგან თავს იკავებდა, რითაც ხშირად უკრაინის ლიდერებისგან კრიტიკას იღებდა.