ჰაკერებმა Binance-იდან სარეკორდო - 6,3 მილიარდი დოლარი მოიპარეს

ქურდობის ფაქტი, რომელშიც ანალიტიკოსებმა ჩრდილოეთ კორეა დაადანაშაულეს, შესაძლოა ყველა დროის უდიდესი ფინანსური ძარცვა იყოს.
ახალი ამბების ფონზე კრიპტოვალუტის ფასები დაეცა, ხოლო Binance-მა შეაჩერა თანხის გატანის ოპერაციები და განაცხადა, რომ ზარალის დასაფარად კომპანიის სახსრებს გამოიყენებს.
Binance-ი თანამშრომლობს გამოძიების ფედერალურ ბიუროსთან და შეერთებული შტატების საიდუმლო სამსახურთან (USSS), განუცხადა Reuters-ს ვითარებაში ჩახედულმა პირმა.
„ეს იყო კომპლექსური თავდასხმა და ჩვენ ყველაფერს ვაკეთებთ სამართალდამცავ ორგანოებთან კოორდინაციით მის მოსაგვარებლად“, — განაცხადა Binance-მა X-ზე გამოქვეყნებულ პოსტში.
ბირჟამ განაცხადა, რომ მომხმარებელთა სახსრები უსაფრთხოდ არის და ის პარტნიორებთან ერთად მუშაობს დაზარალებული აქტივების ნაწილის გასაყინად, საიდანაც ამ დროისთვის დაახლოებით 3 მილიარდი დოლარის ადგილსამყოფელია დადგენილი. მან პარასკევს უფრო ადრე განაცხადა, რომ ელოდება თანხის გატანის სერვისების აღდგენას მომდევნო 48 საათის განმავლობაში. მას არ უხსენებია დარჩენილი 3,3 მილიარდი დოლარის სტატუსი.
Binance-მა განაცხადა, რომ კომპანიამ შიდა რესურსებიდან გამოყო დაახლოებით 6,34 მილიარდი დოლარი კომპანიის სახსრებიდან ზარალის დასაფარად, თუმცა დეტალები იმის შესახებ, თუ საიდან შემოვიდა ეს სახსრები, არ დაუზუსტებია. მის ვებგვერდზე განთავსებული ინფორმაციის თანახმად, კომპანიას აქვს 1 მილიარდი დოლარის ოდენობის ბიტკოინის სარეზერვო ფონდი, რომელიც შექმნილია უსაფრთხოების დარღვევის შემთხვევაში მომხმარებელთა აქტივების დასაცავად. Binance-ის დამფუძნებელმა ჩანპენ ჟაომ X-ზე განაცხადა, რომ კომპანია ფლობს 1 მილიარდ დოლარზე მეტი ღირებულების SpaceX-ის აქციებს.