WEBO.GE ციფრული
სერვისები
💻 საიტების დამზადება
🚀 SEO ოპტიმიზაცია
📞 579 817 817

აშშ-ის მუდმივმა წარმომადგენელმა გაეროში მაიკ უოლცმა ლიბანში ვიზიტისას ამერიკელი სამხედროების ხსოვნას უჩვეულო ფორმით მიაგო პატივი. შარვალ-კოსტიუმში გამოწყობილი დიპლომატი ბეირუთში, აშშ-ის საელჩოს ტერიტორიაზე ათ საზღვაო ქვეითს შეუერთდა და მათთან ერთად 20 აზიდვა გააკეთა.

ვიდეო, რომელიც უოლცმა სოციალურ ქსელ X-ში 17 ნოემბერს გამოაქვეყნა, სწრაფად გავრცელდა და ყურადღება მიიპყრო. დიპლომატის განცხადებით, ეს ჟესტი 1983 წელს ბეირუთში მომხდარი ტერაქტის შედეგად დაღუპული 241 ამერიკელი სამხედრო მოსამსახურის ხსოვნას მიეძღვნა.

უოლცი ბეირუთში 15-17 ნოემბერს იმყოფებოდა. 17 ნოემბერს მან აშშ-ის საელჩოში მყოფ საზღვაო ქვეითებთან ერთად სიმბოლური პერფორმანსი გამართა.

ვიდეოში ჩანს, რომ შარვალ-კოსტიუმში გამოწყობილი დიპლომატი ათი ფორმიანი სამხედრო მოსამსახურის პირისპირ დგება, შემდეგ კი მიწაზე წვება და მათთან ერთად აზიდვებს აკეთებს.

„20 აზიდვა ბეირუთის საელჩოს მცველ საზღვაო ქვეითებთან ერთად – 1983 წელს ირანისა და „ჰეზბოლას“ მიერ მოკლული 241 ამერიკელის ხსოვნისთვის“, – დაწერა უოლცმა ვიდეოს გამოქვეყნებისას.

რა მოხდა ბეირუთში 1983 წელს?

1983 წლის 23 ოქტომბერს ბეირუთში, საერთაშორისო აეროპორტის ტერიტორიაზე განთავსებულ ამერიკელ საზღვაო ქვეითთა ყაზარმაში დანაღმული სატვირთო ავტომობილი შევარდა და აფეთქდა. ტერაქტს 241 ამერიკელი სამხედრო ემსხვერპლა: 220 საზღვაო ქვეითი, 18 მეზღვაური და სახმელეთო ჯარების სამი სამხედრო მოსამსახურე.

ეს აშშ-ის საზღვაო ქვეითთა კორპუსის ისტორიაში ერთ-ერთი ყველაზე ტრაგიკული დღეა – ამერიკული სამხედრო უწყებების შეფასებით, მეორე მსოფლიო ომის დროინდელი ივო ძიმას ბრძოლის შემდეგ კორპუსს ერთ დღეში ამდენი სამხედრო აღარ დაუკარგავს.

იმავე დღეს ბეირუთში მეორე ტერაქტიც მოხდა, რომლის დროსაც 58 ფრანგი მედესანტე დაიღუპა.

ვაშინგტონი თავდასხმაში ირანსა და „ჰეზბოლას“ ადანაშაულებს. უოლცმაც სწორედ ამ პასუხისმგებლობას გაუსვა ხაზს თავის განცხადებაში.

უოლცმა „ჰეზბოლას“ განიარაღება მოითხოვა

ლიბანში ვიზიტისას ამერიკელი დიპლომატი ქვეყნის უმაღლესი თანამდებობის პირებს შეხვდა, მათ შორის, პრეზიდენტ ჯოზეფ აუნს, პრემიერ-მინისტრ ნავაფ სალამსა და პარლამენტის თავმჯდომარე ნაბიჰ ბერის.

შეხვედრების ერთ-ერთი მთავარი თემა „ჰეზბოლას“ განიარაღება და ლიბანის სახელმწიფოს მიერ ქვეყნის ტერიტორიაზე უსაფრთხოების კონტროლის სრულად აღდგენა იყო.

უოლცის განცხადებით, ერთ სახელმწიფოში ორი დამოუკიდებელი არმია ვერ იარსებებს. მან იმედი გამოთქვა, რომ „ჰეზბოლა“ იარაღს ნებაყოფლობით გადასცემს ლიბანის ხელისუფლებას.

ამჟამად ლიბანში უსაფრთხოების მომავალი არქიტექტურის საკითხი განსაკუთრებით აქტუალურია. ვაშინგტონი მხარს უჭერს ისეთ შეთანხმებას, რომელიც ქვეყნის სამხრეთში ისრაელსა და ლიბანს შორის მიღწეული გარიგების შესრულებას და ლიბანის არმიის როლის გაძლიერებას უზრუნველყოფს.

უოლცის ვიზიტის კიდევ ერთი მნიშვნელოვანი საკითხი გაეროს დროებითი ძალების – UNIFIL-ის მომავალი იყო.

მისია სამხრეთ ლიბანში 1978 წლიდან მოქმედებს და მისი მთავარი ამოცანაა რეგიონში ვითარების მონიტორინგი, ცეცხლის შეწყვეტის შეთანხმების შესრულების ხელშეწყობა და ლიბანის სახელმწიფოს მხარდაჭერა.

გაეროს უშიშროების საბჭოს გადაწყვეტილებით, UNIFIL-ის მანდატი 2026 წლის 31 დეკემბერს იწურება. ეს გახანგრძლივების საბოლოო ვადაა, რის შემდეგაც მისიის ეტაპობრივი შემცირება და გაეროს დროებითი ძალების გაყვანა უნდა დაიწყოს.

ვიზიტისას უოლცმა ლიბანელ ოფიციალურ პირებთან იმაზეც იმსჯელა, თუ ვინ უნდა აიღოს პასუხისმგებლობა სამხრეთ ლიბანის უსაფრთხოებაზე გაეროს სამშვიდობო ძალების გასვლის შემდეგ. ეს საკითხი განსაკუთრებით აქტუალურია რეგიონში ისრაელსა და „ჰეზბოლას“ შორის დაპირისპირების ფონზე.

ამრიგად, მაიკ უოლცის ვიზიტი მხოლოდ 1983 წელს დაღუპული ამერიკელი სამხედროების ხსოვნის პატივისცემით არ შემოიფარგლებოდა. ვაშინგტონის მთავარი გზავნილია, რომ ლიბანში შეიარაღებულ ძალებზე კონტროლი სახელმწიფო სტრუქტურებმა უნდა დაიბრუნონ, ხოლო გაეროს მისიის დასრულებამდე უნდა განისაზღვროს, როგორი იქნება სამხრეთ ლიბანის უსაფრთხოების არქიტექტურა.

ნანა ძნელაძე