netgazeti 
„საერთაშორისო გამჭვირვალობა საქართველოს“ განცხადებით, გამოავლინეს 24 მოქმედი თანამდებობის პირი, რომელიც, კანონის მკაფიო მოთხოვნის მიუხედავად, პარალელურად 30 კომპანიაში იკავებს დირექტორის პოზიციას.
ორგანიზაცია ამბობს, რომ თანამდებობის პირებს შორის არიან:
- მარტვილის მუნიციპალიტეტის მერი გიორგი ნაჭყებია;
- აფხაზეთის ა/რ იუსტიციისა და სამოქალაქო ინტეგრაციის მინისტრის მოადგილე თემურ გასვიანი;
- ისნის რაიონის გამგებლის მოადგილე მერაბ ბექაია;
- ბოლნისის მუნიციპალიტეტის მერის მოადგილე ვალენტინა ნავერიანი.
ორგანიზაციის განცხადებით, მოქმედი ანტიკორუფციული კანონმდებლობის თანახმად, საჯარო სამსახური (მათ შორის თანამდებობაზე ყოფნა) და სამეწარმეო სუბიექტის დირექტორობა ერთმანეთთან შეუთავსებელი საქმიანობებია.
„შეზღუდვის მიზანი კორუფციული დანაშაულის პრევენციაა, რადგან სწორედ საჯარო და კერძო სექტორებს შორის არსებული არაჯანსაღი ურთიერთობა წარმოშობს კორუფციის, განსაკუთრებით კი ელიტური კორუფციის რისკებს“, – წერია განცხადებაში.
კანონი ახალ თანამდებობის პირს აძლევს 10 დღიან ვადას, რათა მან დათმოს სამეწარმეო სუბიექტის დირექტორობა; წინააღმდეგ შემთხვევაში, მან უნდა დატოვოს საჯარო სამსახური.
„საერთაშორისო გამჭვირვალობა საქართველო“ ამბობს, რომ 24 მოქმედ თანამდებობის პირს დღემდე არ შეუსრულებია კანონის ეს მკაფიო მოთხოვნა.
თანამდებობის პირების სრული სია შეგიძლიათ ნახოთ აქ.
