#OK! Juls ბიზნესად ქცეული საყვარელი საქმე

ჟურნალი OK! გაგაცნობთ ქართულ ბრენდს Juls-ი, რომელიც 2017 წლიდან ოპერირებს და საკმაოდ საინტერესო და განსხვავებული ნიშა უკავია ბაზარზე. როგორც ბრენდის დამფუძნებელმა ჩვენთან საუბრისას აღნიშნა, ხელნაკეთ ნივთებზე მუშაობა ყოველთვის მისი ძლიერი მხარე იყო, შესაბამისად, საყვარელი საქმე ბიზნესად აქცია და დღეს საზოგადოებას ხელნაკეთ ნივთებს სთავაზობს. ამასთან ერთად, 2024 წლიდან ძველი ფეხსაცმლისა და ჩანთების რესტავრაციაც დაიწყო და Juls-ის საქმიანობა კიდევ უფრო მრავალფეროვანი გახადა. მაშ ასე, გაგაცნობთ ჩვენს გმირს, ჯულიეტა ადანაიას, რომელიც უფრო ვრცლად გვიამბობს ამ და სხვა საინტერესო საკითხების შესახებ.

გაგვაცანით Juls-ი. რამდენი ხანია, რაც ბაზარზე გამოჩნდა და საიდან გაჩნდა იდეა?

ჩემი ბრენდი Juls-ი 2017 წელს გამოჩნდა ბაზარზე და თავდაპირველად ფეხსაცმელების გაყიდვით დაიწყო ფუნქციონირება, შემდეგ დავამატეთ ჩანთები და საფულეები, რომელთა წარმოებასაც თავად უზრუნველვყოფდი საკუთარი რესურსებითა და ძალებით.

იდეა გაჩნა ძალიან დიდი ხნის წინ, რადგან ყოველთვის მსურდა მქონოდა საკუთარი ბიზნესი, გამომდინარე იქიდან, რომ ჩემი ძლიერი მხარე ხელნაკეთ ნივთებზე მუშაობა იყო. ეს ყოველთვის დიდ სიამოვნებას მანიჭებდა. ჯერ კიდევ მაშინ, როცა არც ისე აქტუალური იყო ონლაინბიზნესი, ჩემ მიერ დამზადებულ ნივთებს ვყიდდი. თავადაც მუდამ საკუთარი ხელით შექმნილი სამოსი ან გადაკეთებული ფეხსაცმელი მეცვა. შესაბამისად, იდეა უკავშირდება შემოქმედების დიდ სიყვარულს, რაც მუდამ თან სდევდა ჩემს ცხოვრებას.

ტყავის კურსზეც გვიამბეთ, რომელსაც საზოგადოებას სთავაზობთ.

საზოგადოებას ვთავაზობ საავტორო ტყავის შემსწავლელ კურსს, რომლის განხორციელებაც პანდემიის შემდეგ დავიწყე, ეს იდეა გაჩნდა სწორედ მაშინ, როცა ძნელი იყო ამ კუთხით მსგავსის აღმოჩენა. შემდეგ სხვა საწარმოებმაც გააკეთეს იგივე და ახლა უკვე ამის კონკურენციაა ბაზარზე. ზოგიერთი ჩემი მოსწავლეც ამას აკეთებს, ეს მიხარია, რადგან მიმაჩნია, რომ მათთვის შთაგონების წყარო გავხდი.

ჩემს სახელოსნოს ხშირად ტურისტებიც სტუმრობენ მასტერკლასებზე და დაუვიწყარი მოგონებები მიაქვთ საქართველოდან. ეს სტუმრობა ზოგჯერ მეგობრობით და მუდმივი კომუნიკაციითაც გრძელდება.

რა არის მთავარი წარმატების მისაღწევად?

წარმატების მისაღწევად საჭიროა თავდაუზოგავი შრომა, დისციპლინა და აუცილებლად კარგი ურთიერთობები ადამიანებთან. როდესაც საზოგადოების დიდ ნაწილთან გაქვს შეხება, აუცილებელია ნდობა, რაც ჩნდება გულწრფელობით, დახმარების სურვილით და იმ შეგრძნებით, როდესაც სხვისი წარმატება გულწრფელად გახარებს. სწორედ ესაა ჩემი წარმატების გასაღები.

თქვენი პროექტის შესახებ გვიამბეთ.

2024 წელს დავამატე ახალი პროექტი – ძველი ფეხსაცმლისა და ჩანთების რესტავრაცია, რომელიც განვითარების პროცესშია. ეს იდეა დაკავშირებულია მდგრადი მოდის განვითარებასა და ბუნების დაცვასთან. ყველა მოგზაურობის დროს ვსწავლობ რაღაც ახალს, რასაც პრაქტიკაში ვიყენებ. ამასთან ერთად, ვხვდები სხვადასხვა ქვეყნის არტისტებს და მათგან შთაგონებებს ვიღებ.

შემიძლია თქვენი ძველი ნივთი, რომელიც ძალიან გიყვართ, ახალი დიზაინერული შტრიხებით შევცვალო და განვაახლო, შევძინო მას ახალი სიცოცხლე. დავიწყე ჩემი საყვარელი აქსესუარის, შლაპების გაფორმება, რომელიც არავის რჩება შეუმჩნეველი. მაქვს შლაპის ფორმის საავტორო ჩანთაც, რომელიც უნიკალური სტილია და ვამაყობ ამ ქმნილებით.

სამომავლო გეგმები გაგვიზიარეთ.

ჩემი სამომავლო გეგმებია ახალ დიდ სტუდიაში გადასვლა და საინტერესო სივრცის შექმნა, სადაც სწავლა, განტვირთვა და დასვენება ერთად იქნება გაერთიანებული.

ტექსტი: ციაკო ღამბაშიძე

ფოტო: ალექსეი სეროვი