#OK! „ეს სამეცნიერო ფანტასტიკა არ არის“ – 10 წლის შემდეგ ყველა სახლში რობოტი იქნება?

რობოტები, რომლებსაც ამჟამად წარმოებასა და ექსტრემალურ პირობებში იყენებენ, შეიძლება მალე ჩვენი ყოველდღიური ცხოვრების განუყოფელი ნაწილი გახდეს – ამის შესახებ ინფორმაციას Boston Dynamics-ის აღმასრულებელი დირექტორი, რობერტ პლატერი ავრცელებს. მან აღნიშნა, რომ ხელოვნური ინტელექტისა და მობილური ტექნოლოგიების განვითარების წყალობით, სახლის რობოტები უახლოეს მომავალში რეალობად იქცევა

პლატერის თქმით, კომპანია უკვე საკუთარი მოდელების სახლის პირობებთან ადაპტაციაზე მუშაობს. ცნობილ რობოტ ძაღლს – Spot-ი, რომელსაც დაბრკოლებების გადალახვა და კატასტროფის ზონებში დავალებების შესრულება შეუძლია, მალე უფრო ჭკვიან ვერსიებში ვიხილავთ.

„ჩვენ ვცდილობთ, რომ რობოტი უხმაურო, უსაფრთხო და მარტივად სამართავი იყოს. მან სახლში დახმარება უნდა შეძლოს, თუნდაც  დალაგება, ბავშვის მოვლა ან საჭმლის მომზადება“- თქვა პლატერმა.

Boston Dynamics, რომელიც Hyundai Motor Group-ს ეკუთვნის,  ბიომიმეტიკური რობოტების შემუშავებაზე მუშაობს. მათი ჰუმანოიდი რობოტი, რომელსაც აკრობატული ილეთების შესრულება შეუძლია, უკვე კვლევებში მონაწილეობს, მაგრამ მომავალში მისი ყოველდღიური გამოყენებისთვის ადაპტირება შეიძლება. პლატერმა აღნიშნა, რომ წარმატების გასაღები ინტერნეტთან და მანქანურ სწავლებასთან ინტეგრაცია იქნება, რაც რობოტებს საშუალებას მისცემს, რომ გამოცდილებაზე დაყრდნობით ისწავლონ.

სახლის რობოტების ბაზარი მილიარდობით დოლარად არის შეფასებული. ხელოვნურ ინტელექტში ინვესტიციების წყალობით, რობოტების ღირებულება მცირდება და მათი ფუნქციები ფართოვდება. პლატერმა ხაზი ეთიკურ ასპექტებსაც გაუსვა:

„აუცილებელია, რომ კონფიდენციალურობისა და უსაფრთხოების საკითხები იქნას გათვალისწინებული. ჩვენ ვავითარებთ სისტემებს, სადაც რობოტებს პერსონალური მონაცემების დამახსოვრება მფლობელის თანხმობის გარეშე არ შეუძლიათ “.

MIT-ის ექსპერტები ვარაუდობენ, რომ 2035 წლისთვის პირადი ასისტენტის ტიპის რობოტები გავრცელდება, რომლებიც ხანდაზმულ ადამიანებს გადაადგილებაში დაეხმარებიან. GPT-ის მსგავს ჩატბოტებთან ინტეგრირებული მოდელები ადამიანებთან დიალოგის წარმოებას და გართობასაც კი შეძლებენ, თუმცა, რისკები მაინც არსებობს. მაგალითად, ჰაკერული თავდასხმები სახლის რობოტებზე ან მომსახურების სექტორში სამუშაო ადგილების დაკარგვა. ამ საფრთხეების შესამცირებლად Boston Dynamics ისეთ მარეგულირებლებთან თანამშრომლობს, როგორიცაა EU AI Act.

Boston Dynamics უდიდეს ფარმაცევტულ და ლოჯისტიკურ კომპანიებთან თანამშრომლობს, მაგრამ სახლის სეგმენტს შემდეგ დიდ ნაბიჯად მიიჩნევს.

„წარმოიდგინეთ რობოტი, რომელიც თქვენს ეზოში თოვლს წმენდს ან დილით ყავა მოაქვს. ეს სამეცნიერო ფანტასტიკა არ არის, ეს რამდენიმე წლიანი განვითარების საკითხია“– ამბობს პლატერი.

Gartner-ის ანალიტიკოსები აღნიშნავენ, რომ სახლის რობოტების გავრცელება 2030 წლის შემდეგ დაჩქარდება, რადგან ამ დროისთვის ელემენტებისა და სენსორების ფასი დაეცემა. იდეის კრიტიკოსები, მათ შორის სტენფორდის ეთიკის პროფესორი ტიმოთი ფიცგენრისი,  „სოციალური გაუცხოების“ შესახებ გვაფრთხილებენ და ამბობენ, რომ შესაძლოა, რობოტების გამოჩენამ ადამიანური ურთიერთობები შეამციროს. იდეის მომხრეები კი პირიქით, რობოტებს ხანდაზმულებში მარტოობის პრობლემის გადაჭრის საშუალებად მიიჩნევენ.

იდეალურ სცენარში, Boston Dynamics-ის რობოტები კომერციულად ხელმისაწვდომი ამ ათწლეულის ბოლოსთვის იქნება. მათი ფასი მახასიათებლების მიხედვით, 5000-დან 20 000 დოლარამდე იქნება. კომპანია უკვე საპილოტე პროგრამებს ცდის.

სავარაუდოდ, 2026 წელს, ლას-ვეგასში CES-ზე სახლის რობოტების ადრეულ ვერსიებს წარმოადგენს.

ასევე დაგაინტერესებთ

#OK! რობოტი მთავრობაში – ალბანეთმა ხელოვნური ინტელექტი მინისტრად დანიშნა