#OK! შაკირას უფასო კონცერტზე კოპაკაბანას სანაპიროზე ორი მილიონი ადამიანი შეიკრიბა

კოლუმბიელმა სუპერვარსკვლავმა შაკირამ რიო-დე-ჟანეიროს ლეგენდარულ კოპაკაბანას სანაპიროზე გრანდიოზული უფასო კონცერტი გამართა და ისტორიაში ერთ-ერთი ყველაზე მასშტაბური მუსიკალური ღონისძიება შექმნა. Billboard-ის ინფორმაციით, შაბათ საღამოს გამართულ შოუზე დაახლოებით 2 მილიონი ადამიანი შეიკრიბა.

კონცერტი შაკირას მსოფლიო ტურნეს — Las Mujeres Ya No Lloran („ქალები აღარ ტირიან“) — ფარგლებში გაიმართა, რომელიც მისი 2024 წლის ამავე სახელწოდების ალბომს ეძღვნება. დღის განმავლობაში ფანები სანაპიროზე ადრე მივიდნენ საუკეთესო ადგილების დასაკავებლად, ხოლო საღამოსთვის კოპაკაბანა ადამიანების უზარმაზარ ზღავად გადაიქცა.

მომღერალი სცენაზე დაახლოებით 23:00 საათზე გამოვიდა — დაგეგმილზე ცოტა გვიან — თუმცა მისი გამოჩენა მაყურებელმა ოვაციებითა და ემოციური შეძახილებით აღნიშნა. შოუს განსაკუთრებული ვიზუალური ნაწილი დრონების წარმოდგენა იყო, რომლებმაც ცაზე წარწერა „I love you Brazil“ („მიყვარხარ, ბრაზილია“) გამოსახეს.

კონცერტის განმავლობაში შაკირამ ბრაზილიასთან საკუთარი მრავალწლიანი კავშირის შესახებ ისაუბრა:
„აქ პირველად 18 წლის ასაკში ჩამოვედი, თქვენთვის სიმღერაზე ვოცნებობდი. ახლა კი შეხედეთ — ცხოვრება მართლაც ჯადოსნურია,“ – მიმართა მან აუდიტორიას.

სეტლისტში მომღერლის ყველაზე ცნობილი ჰიტები შევიდა, მათ შორის Hips Don’t Lie, La Tortura და La Bicicleta. კონცერტი კი სიმღერით BZRP Music Sessions #53/66 დასრულდა — ტრეკით, რომელიც განსაკუთრებული ყურადღების ცენტრში მისი პირადი ცხოვრების ცვლილებების შემდეგ მოექცა.

რიო-დე-ჟანეიროს მერმა ედუარდო კავალიერემ სოციალურ ქსელ X-ზე ღონისძიებას „ისტორიული მომენტი“ უწოდა და დაწერა: „She-Wolf-მა რიოში ისტორია შექმნა,“ — შაკირას 2009 წლის ჰიტზე მინიშნებით.

კონცერტმა ქალაქის ეკონომიკაზეც მნიშვნელოვანი გავლენა მოახდინა — ადგილობრივ მოვაჭრეებს მთელი დღის განმავლობაში აქტიური გაყიდვები ჰქონდათ, ხოლო სასტუმროებსა და რესტორნებში ვიზიტორების რაოდენობა მნიშვნელოვნად გაიზარდა. ოფიციალური პირების თქმით, მსგავსი მასშტაბის ღონისძიებები ტურიზმისა და ადგილობრივი ბიზნესის განვითარებას უწყობს ხელს.

ემოციური იყო ფანების რეაქციაც – ბევრი მათგანი აღნიშნავდა, რომ შაკირას მუსიკა მათი ცხოვრების ნაწილია ბავშვობიდან, რის გამოც კონცერტი განსაკუთრებულ გამოცდილებად იქცა.

შოუს განმავლობაში არტისტმა ქალების ძალასა და გამძლეობაზეც ისაუბრა:
„ჩვენ, ქალები, ყოველ დაცემაზე კიდევ უფრო ბრძენები ვდგებით ფეხზე,“ — განაცხადა მან სცენიდან.