U20 | უმცროსი ბორჯღალოსნები სანაკრებო ბაზაზე 2025 წლის ჩემპიონატისთვის მზადებას აგრძელებენ

უმცროსი ბორჯღალოსნები „შევარდენის“ სანაკრებო ბაზაზე 2025 წლის მსოფლიო რაგბის 20-წლამდელთა ჩემპიონატისთვის მზადებას აგრძელებენ.

მთავარი მწვრთნელის, ლადო კილასონიას განკარგულებაში ამჟამად 40 მოთამაშეა. გუნდს უკვე შეუერთდა ლეგიონერთა ნაწილი.

„დიდი შეკრება დასრულდა და მზადების დასკვნით ფაზაში ვართ, რომელიც მოკლე - 3-4-დღიან შეკრებებს მოიცავს. შემოგვიერთდნენ ლეგიონერები და მოცემული მომენტისთვის მოთამაშეთა 95% ჩვენთან არის. გვაქვს პატარ-პატარა ტრავმები და ვნახოთ რა იქნება. გამოგვაკლდა გიორგი ხაინდრავა, რომელიც ეროვნულ ნაკრებშია გამოძახებული. ჩვენთვის ძალიან სასიხარულოა, როდესაც 20-წლამდელებს მთავარ ნაკრებში ეძახიან, თუმცა ის ჩემპიონატზე ძალიან დაგვაკლდება“ - აღნიშნა ლადო კილასონიამ.

მზადების ფარგლებში უმცროსმა ბორჯღალოსნებმა თებერვლის ბოლოს სამხრეთ აფრიკელ თანატოლებთან ორი ამხანაგური თამაში გამართეს, 14 ივნისს 18 საათზე კი „ავჭალაზე“ ინგლისს ესპარინგებიან.

„ჩვენი მიზანი იმ შეცდომების გამოსწორებაა, რომელთა გამოც სამხრეთ აფრიკასთან დავზარალდით, თუმცა თამაშებს შორის დიდი წყვეტა იყო და გასახსენებელი და გასამეორებელი გვაქვს სათამაშო სტრატეგია. გვაქვს კიდევ ერთი მოსამზადებელი შეხვედრა ინგლისთან, სადაც ყურადღება დაეთმობა როგორც შეთამაშებას, ასევე სელექციას. როდესაც თამაშებს შორის ამხელა წყვეტაა, სხვა გამოსავალი არ რჩება. არის პოზიციები, სადაც ჯერ კიდევ გვაქვს კითხვის ნიშნები. მნიშვნელოვანია ვნახოთ როგორ ფორმაში არიან მოთამაშეები, როგორია საერთო სურათი და ასევე ის, თუ როგორ იმუშავებს ჩვენს მიერ დასახული გეგმა“ - განაცხადა კილასონიამ.

20-წლამდელთა ჩემპიონატს წელს იტალია მესამედ (2011 და 2015 წლების შემდეგ) უმასპინძლებს. ის 29 ივნისს დაიწყება და 19 ივლისს დასრულდება, თამაშები კი ლომბარდიისა და ვენეტოს ოთხ ქალაქში გაიმართება: კალვიზანო, როვიგო, ვერონა და ვიადანა.

საქართველო გ ჯგუფში მოხვდა და 29 ივნისს კალვიზანოში ირლანდიას შეხვდება; 4 ივლისს ახალ ზელანდიას ვიადანაში ეთამაშება; 9 ივლისს კი იტალიას კალვიზანოში შეერკინება. ნახევარფინალური თამაში 14 ივლისს ვერონაში, ან ვიადანაში გვექნება, ხოლო ფინალური თამაშები 19 ივლისს კალვიზანოსა და როვიგოში გაიმართება.

20-წლამდელთა ჩემპიონატის ა ჯგუფში ინგლისი, ავსტრალია, სამხრეთ აფრიკა და შოტლანდია; ხოლო ბ ჯგუფში საფრანგეთი, არგენტინა, უელსი და ესპანეთი მოხვდნენ.

RUGBY.GE