აგენტების კანონზე „ქართულ ოცნებასთან“ მუშაობის შესახებ ალან ბერსეს განცხადებას კრიტიკა მოყვა

ევროპის საბჭოს გენერალურმა მდივანმა ალან ბერსემ საქართველოში სამდღიანი ვიზიტი 20 დეკემბერს გამართული პრესკონფერენციით დაასრულა, სადაც განაცხადა, რომ „ქართული ოცნების“ ხელისუფლებისგან მიიღო დაპირება, რომ უცხოელი აგენტების შესახებ კანონში ცვლილებების შეტანის მიზნით სამუშაო ჯგუფი შეიქმნება. განცხადებას მაშინვე მოყვა პრეზიდენტ სალომე ზურაბიშვილის, სამოქალაქო საზოგადოების ორგანიზაციების წარმომადგენლებისა და ოპოზიციის ლიდერების კრიტიკა. ისინი ხაზგასმით აღნიშნავენ, რომ პრობლემა არა თავად კანონში, არამედ რუსული-სტილის ხელისუფლებაშია.  

• 20/12/2024 – ალან ბერსე: „ქართულმა ოცნებამ“ უცხოელი აგენტების შესახებ კანონში ცვლილების შეტანის პირობა დადო

პრეზიდენტის გამოხმაურება

პრეზიდენტმა სალომე ზურაბიშვილმა ამ თემაზე თავისი მოსაზრებები ევროპის საბჭოს გენერალურ მდივანთან და მის დელეგაციასთან შეხვედრის შემდეგ გააჟღერა. მან ხაზგასმით აღნიშნა, რომ ისინი, როგორც ჩანს, „ცოტა გაუგებრობაში“ არიან და რომ „კარგად არ ესმით აქაური სიტუაცია“.

პრეზიდენტმა განაცხადა, რომ შეხვედრის დროს მან ხაზგასმით აღნიშნა, რომ ალან ბერსეს არ აქვს „მანდატი“, რომ „რაღაც კომისია დანიშნონ ჯერ არავისგან აღიარებულ ხელისუფლებასთან…  ვის რაში აინტერესებს „რუსული კანონის“ შეცვლა თუ არ შეცვლა“.

ზურაბიშვილმა ხაზგასმით აღნიშნა, რომ „ქართული ოცნების“ წარმომადგენლებმა არა მხოლოდ მოატყუეს ევროპის საბჭოს დელეგაცია, არამედ ასევე დაარწმუნეს გენერალური მდივანი, რომ ის „კონსტრუქციულ დიალოგში“ შედიოდა, ხოლო რამდენიმე წუთის შემდეგ „პროვოკაციული განცხადებები“ გააკეთეს შსს-ს დასანქცირებული მაღალჩინოსნების ღირსების ორდენებით დაჯილდოების შესახებ.

პრეზიდენტმა აღნიშნა, რომ ეს სიტუაცია კიდევ ერთი მაგალითია „რუსეთის ხელისუფლების“ ქმედებებისა, რომელიც ცდილობს მიმართოს ფორმალობას, მაგალითად, ცვლილება შეიტანოს კანონში, რათა ჩაახშოს ხალხის ხმა და დაასრულოს პროტესტი. პრეზიდენტმა ხაზგასმით აღნიშნა, რომ კრიზისიდან გამოსვლის ერთადერთი გზა ახალი არჩევნებია.

სსო-ების გამოხმაურება

ადგილობრივი არასამთავრობო ორგანიზაციების ხელმძღვანელებმა გააკრიტიკეს ევროპის საბჭოს გენერალური მდივნის განცხადება:

ნონა ქურდოვანიძე, საქართველოს ახალგაზრდა იურისტთა ასოციაცია (საია): „ევროპის საბჭოს მთავარ საკონსულტაციო ორგანოს, ვენეციის კომისიას, ,,რუსულ კანონზე“ ცალსახად აქვს ნათქვამი, რომ ეს კანონი შეცვლას არ ექვემდებარება, გასაუქმებელია. ვერანაირი სამუშაო პროცესი ვერ შეძლებს ამ კანონის გაკეთილშობილებას, ის უნდა გაუქმდეს. თუმცა, დღეს არსებულ კრიზისს ამ კანონის გაუქმება ვერ უშველის. წამების და დაუსჯელობის სისტემურ პრაქტიკას ევროსაბჭოს გენერალური მდივნის მიერ გახმოვანებული ფორმატი ვერ გამოასწორებს“.

თამთა მიქელაძე, სოციალური სამართლიანობის ცენტრი: „რუსული კანონი არ ექვემდებარება გაკეთილშობილებას. ის პარადიგმულად ჩანასახშივე ანტიდემოკრატიული კანონია და სწორედ ეს თქვა ვენეციის კომისიამ. რეჟიმის გაკეთილშობილების მანდატი არც ერთ ორგანიზაციას არ აქვს, როცა ხალხს ქუჩებში აწამებენ, მწამებლებს ღირსების მედლების დაკიდებას უპირებენ და უფრო მძიმე ავტორიტარიზმის მუქარას ვიღებთ ყოველ დღე“.  

ნინო დოლიძე, სამართლიანი არჩევნებისა და დემოკრატიის საერთაშორისო საზოგადოება: „გუშინ, პარტნიორი სამოქალაქო ორგანიზაციების წარმომადგენლებთან ერთად, შევხვდი ევროსაბჭოს გენერალურ მდივანს. ჩვენი საუბარი შეეხებოდა ქვეყანაში მიმდინარე პროცესებს, ადამიანის უფლებების უმძიმეს დარღვევებს, პოლიტიკურ კრიზისს. ასევე, ჩვენთან ერთად იყვნენ დაზარალებული ადამიანები, რომლებმაც თავად ისაუბრეს და გაუზიარეს თავიანთი ისტორიები. ამ შეხვედრაზე საერთოდ არ ყოფილა განხილული რუსული კანონი და ამ კანონზე საუბარი არც ყოფილა ჩვენი ინტერესი. დღეს ქვეყანაში გაცილებით მძიმე პოლიტიკური და სამართლებრივი კრიზისია და საზოგადოებას ნათლად აქვს ჩამოყალიბებული კონკრეტული ორი მოთხოვნა“.

ბაია პატარაია, საფარი: „მინდა, ყველამ იცოდეთ, რომ გუშინ არასამთავრობო ორგანიზაციებს ბერსესთან საუბარში არც ერთხელ არ უხსენებიათ რუსული კანონი ან მისი გაუქმება. ვისაუბრეთ წამებაზე და უფლებების მასიურ დარღვრვებზე და ჩვენი მოთხოვნები უცვლელად გავაჟღერეთ: თავისუფლება პოლიტპატიმრებს; ახალი არჩევნები საქართველოს! არანაირ რუსულ კანონებზე მოლაპარაკებას არ ვაპირებთ! არალეგიტიმური და მოძალადე რეჟიმი უნდა დასრულდეს!“

ოპოზიციის გამოხმაურება

პარტია „საქართველოსთვის“ ლიდერმა გიორგი გახარიამ ფეისბუქზე დაწერა: „მე მგონი, ამასაც ვიცე-პრემიერობას შეჰპირდა ივანიშვილი“. მას მხედველობაში ჰქონდა „ქართული ოცნების“ მთავრობის გადაწყვეტილება სანქცირებული შინაგან საქმეთა მინისტრის ვახტანგ გომელაურის მესამე ვიცე-პრემიერად დანიშვნის თაობაზე.  

მსგავსი სარკასტული ტონი შეინიშნება „ერთიანობა – ნაციონალური მოძრაობის“ ლიდერის თინა ბოკუჩავას ფეისბუქის პოსტში: „დაჯექი, ორიანი“.

„კოალიცია ცვლილებისთვის“ ერთ-ერთმა ლიდერმა ნიკა გვარამიამ განაცხადა, რომ „ტყვეებით ვაჭრობა და რაღაც რეფორმებზე ლაპარაკი არალეგიტიმურ და ხალხის წამებაში მხილებულ კონსტიტუციური გადატრიალების მომწყობ ბანდასთან არ შეიძლება“. „განსაკუთრებით იმათთვის, ვისაც აღელვებდა, რატომ არ მივიდა შეხვედრაზე ჩვენი კოალიცია. ასევე ყველას მინდა შევახსენო: შარლ მიშელი 2 არ იქნება. ტერორისტებთან მოლაპარაკება არ შეიძლება. არც მოსალაპარაკებელია რამე: მხოლოდ ახალი არჩევნები. ნათქვამია და აღარ უნდა გადაიხედოს“, – აღნიშნა მან.

კოალიაცია „ძლიერი საქართველოს“ წარმომადგენელმა ანა ნაცვლიშვილმა განაცხადა, რომ მოთხოვნები უცვლელია: „უპირობო თავისუფლება პოლიტიკურ პატიმრებს და ახალი, სამართლიანი არჩევნები“. „რუსული კანონის შემდეგ კიდევ იმდენი წითელი ხაზი გადაიკვეთა – 26 ოქტომბერს, შემდეგ 28 ნოემბერს, შემდეგ ყოველ დღე და ღამე 28 ნოემბრის მერე, ერთი რუსული კანონის შეცვლა, თუნდაც უკან წაღება, ამას ვეღარ შეცვლის… არ ვაპირებ  თანამოქალაქეების დალეწილ ძვლებზე და გადამწვარ ნერვებზე გადავიარო. არა რუსულ ხელისუფლებას!“, – წერს ნაცვლიშვილი.

ასევე წაიკითხეთ:

• 20/12/2024 – ევროპის საბჭოს გენერალური მდივანი საქართველოს სტუმრობს

This post is also available in: English (ინგლისური) Русский (რუსული)