,, არც ჩვეულებრივი ჭურვი და არც ატომური ბობი სახელით და გვარით არ ეძებს ადამიანს. ის ქოცის შვილსაც მოხვდება” – ბექა კობახიძე

3

ილიაუნის ასოცირებული პროფესორი ბექა კობახიძე:

,,საფრანგეთი ევროკავშირის ერთადერთი ბირთვული სახელმწიფოა. მაკრონი ამბობს, რომ ამ ქოლგით მთელს ევროპას დავიცავთო.

პოტენციური ბირთვული ომი მიდის შემდეგნაირად: ერთი სახელმწიფო რომ ესვრის მეორეს, ეს მეორე საპასუხოს ესვრის პირველს.

ჰოდა აქ რა კითხვა მაქვს: ვთქვათ, მოსკოვი ესვრის ბერლინს და აცხადებს, რომ საფრანგეთს არ ესვრის და არც აპირებს რომ ესროლოს თუ თავად საფრანგეთმა არ ისროლა; ასეთ შემთხვევაში, გერმანიის გამო, რატომ ჩაიგდებს საფრანგეთი თავს ბირთვული დარტყმის ქვეშ? ფრანგი მოქალაქეები აპატიებენ ამას საფრანგეთის პრეზიდენტს?
ასე რომ, არამგონია საფრანგეთის მფლობელობაში არსებული ბირთვული იარაღი თანაბრად იცავდეს პარიზს და ბერლინს.

ძალიან მოძველდა ის მსოფლიო წესრიგი, სადაც მსოფლიოს მესამე ეკონომიკა და ევროპის პირველი ეკონომიკა – გერმანია – გაეროს უშიშროების საბჭოში არ არის და მას ბირთვული იარაღი არ აქვს.

იგივე ითქმის მსოფლიოს მეოთხე ეკონომიკაზე – იაპონიაზე.

გაეროს უშიშროების საბჭოს წევრობა და ბირთვული იარაღის ფლობა მეორე მსოფლიო ომის შედეგებს ეფუძნება. აქედან გავიდა 80 წელი. მასში დამარცხებულები მსოფლიოს მე-3 და მე-4 ეკონომიკები, დემოკრატიული სახელმწიფოები არიან, არავის უქმნიან საფრთხეს და თავად დგანან თავისუფალი სამყაროს სადარაჯოზე. სამაგიეროდ, მათ თავად ექმნებათ საფრთხე ავტორიტარული დიდი სახელმწიფოებისგან და არ არიან სუვერენულნი/თვითმყოფადნი თავდაცვის საკითხში. ეს არა იმიტომ რომ პატარები არიან, არამედ 1945 წლის ინერციის გამო. ეს უნდა შეიცვალოს. პარიზზე და ვაშინგტონზე უსაფრთხოების გადაბარება ინფანტილიზმია. თუ არმაგედონი დაიწყო, ყველა საკუთარ თავს მიხედავს. ჩვენ გვახსოვს კოვიდ ვაქცინის შექმნის პირველი თვეები – დიდი სახელმწიფოები არავის უზიარებდნენ ვაქცინას, სანამ საკუთარი მოთხოვნილებები არ დაიკმაყოფილეს. ასე და კიდევ უფრო ასე იქნება პოტენციური დიდი ომის დროს.

ახლა ამის წამკითხავი იკითხავს, გერმანიაზე და იაპონიაზე რომ ჯავრობ, ჩვენ რა გვეშველება ამ დიდ ომშიო? თუ დიდი ომი მოხდა, ის პირველ რიგში სუსტებს და პატარებს ჩაყლაპავს, მათ შორის ჩვენც. ამიტომ, ამის თავიდან ასაცილებლად, დიდმა აგრესიულმა სახელმწიფოებმა, პირველ რიგში რუსეთმა, უნდა დაინახონ, რომ დემოკრატიულ სამყაროს აქვს უნარი დაიცვას წესებზე დამყარებული მსოფლიო წესრიგი, არ დაუშვას სუვერენიტეტისა და ტერიტორიული მთლიანობის პრინციპების უგულებელყოფა. სად უნდა დაინახონ ეს დიდმა აგრესორებმა? პირველ რიგში უკრაინაში.

არც ჩვეულებრივი ჭურვი და არც ატომური ბობი სახელით და გვარით არ ეძებს ადამიანს. ის ქოცის შვილსაც მოხვდება.
რომ არ მოხვდეს, ამისთვის ძალიან მნიშვნელოვანია უკრაინამ ომი არ წააგოს და რუსეთს მადა არ გაეზარდოს შემდგომი ომების საწარმოებლად.“