radiotavisupleba ახალი ამბები 
ირანის დელეგაციას მომავალ კვირას, ნიუ-იორკში, გაეროს გენერალურ ასამბლეაზე დასწრების ნებას დართავენ, განაცხადა სახელმწიფო დეპარტამენტმა ხუთშაბათს.
„ჩვენი პოლიტიკის შესაბამისად, დელეგაციაზე გავრცელდება გადაადგილების შეზღუდვები და დაწესდება აკრძალვები ფუფუნების ნივთებისა და სხვა საქონლის შეძენაზე. დელეგაციის შემადგენლობა უფრო მცირერიცხოვანია, ვიდრე გასულ წელს“, — განაცხადა სახელმწიფო დეპარტამენტის წარმომადგენელმა.
წარსულში აშშ-ის მთავრობამ ირანის დელეგაციას მაღაზიებით სარგებლობა აუკრძალა და მისი გადაადგილება შეზღუდა გაერთიანებული ერების ორგანიზაციის შტაბ-ბინას, ირანის გაეროს მისიას, გაეროში ელჩის რეზიდენციასა და ნიუ-იორკის ჯონ ფ. კენედის სახელობის აეროპორტს შორის მგზავრობით.
ირანის საგარეო საქმეთა სამინისტროს Reuters-ის კომენტარის მოთხოვნაზე დაუყოვნებლივი პასუხი არ გაუცია.
1947 წლის გაეროს „შტაბ-ბინის შესახებ შეთანხმებით“, შეერთებულ შტატებს ზოგადად მოეთხოვება, უცხოელ დიპლომატებს გაერთიანებული ერების ორგანიზაციაში დაშვების უფლება მისცეს. თუმცა ვაშინგტონი აცხადებს, რომ მას შეუძლია განაცხადი უარყოს „უსაფრთხოების, ტერორიზმისა და საგარეო პოლიტიკის“ მიზეზებით.
16 სექტემბერს ტრამპის ადმინისტრაციამ განაცხადა, რომ პალესტინელ ოფიციალურ პირებს გაეროს შეხვედრაზე შესვლაზე უარს ეუბნება - რითაც გაახანგრძლივა გასული წლიდან მოქმედი აკრძალვა იმ მოქმედების გამო, რომლებიც მათ „ისრაელ-პალესტინის კონფლიქტის ინტერნაციონალიზაციისთვის“ მიზნით ჩაიდინეს, მათ შორის, საერთაშორისო ტრიბუნალებში ისრაელის წინააღმდეგ საქმეების წარმოებით.
აშშ-ის ამ ნაბიჯის ფარგლებში ვიზაზე უარი ეთქვა პალესტინის პრეზიდენტ მაჰმუდ აბასს, - განაცხადა პალესტინელმა ოფიციალურმა პირმა.
