აშშ-ში რადარებიდან გაქრა ბერმუდის კუნძულებიდან მომავალი სამედიცინო თვითმფრინავი

აშშ-ის ცაში, მასაჩუსეტსის შტატის კუნძულ ნანტაკეტის რაიონში, რადარებიდან გაუჩინარდა თვითმფრინავი, რომელიც სამედიცინო რეისს ასრულებდა. ის ბერმუდის კუნძულებიდან ბოსტონში მიფრინავდა. მასში ექვსი ადამიანი იმყოფება.

თვითმფრინავი Gulfstream G-100 ეკუთვნის კანადურ კომპანიას Latitude Air Ambulance, რომელიც სპეციალიზებულია „საჰაერო სასწრაფო დახმარების“ რეისებზე. ის ბერმუდიდან გაფრინდა პარასკევს ღამით, 3 ოქტომბერს. ადგილობრივი დროით დაახლოებით ღამის პირველ საათზე მასთან კავშირი გაწყდა. მანამდე მონიტორინგის სამსახურებმა ფრენის სიმაღლის მკვეთრი შემცირება დააფიქსირეს - 24-დან 11 ათას ფუტამდე.

1 საათსა და 20 წუთზე ამერიკის სანაპირო დაცვის საჰაერო და სახმელეთო სამსახურებმა სამძებრო-სამაშველო ოპერაცია დაიწყეს. მასში მონაწილეობენ თვითმფრინავები HC-144 Ocean Sentry და HC-130 Hercules, ასევე ვერტმფრენი MH-60 Jayhawk და სამაშველო გემები.

თვითმფრინავში იმყოფბა ეკიპაჟის ოთხი წევრი და ორი მგზავრი. როგორც Latitude Air Ambulance-ში განუცხადეს USA Today-ს, მათი სამედიცინო თვითმფრინავების ეკიპაჟის ჩვეულებრივი შემადგენლობაა ორი პილოტი, ექიმი-რეანიმატოლოგი და ექთანი. ხანდახან თვითმფრინავში შეიძლება დამატებით იმყოფებოდეს ექიმი-თერაპევტი. კომპანია დაკავებულია როგორც ავადმყოფების ევაკუაციით, ისე მკურნალობის შემდეგ მათი სახლში დაბრუნებით. ბერმუდის აეროპორტში დაადასტურეს, რომ თვითმფრინავს, რომლის შემადგენლობაშიც ოთხი ადამიანი იყო, ორი მგზავრი გადაჰყავდა.

ძებნა გრძელდება.