ბაიდენი ქარიშხლით დაზარალებულ ჩრდილოეთ კაროლინაში ჩადის

2 ოქტომბერს შეერთებული შტატების პრეზიდენტი სტიქიით ძლიერ დაზარალებულ ჩრდილოეთ კაროლინას ეწვევა. ჯო ბაიდენს სურს ადგილზე გაეცნოს შექმნილ ვითარებას და შეისწავლოს შტატში დამანგრეველი ქარიშხლისგან დატოვებული კვალის შედეგები.

”სწრაფად უნდა დავიწყოთ აღდგენის პროცესი”, - თქვა ბაიდენმა გამგზავრებამდე ერთი დღით ადრე. "ადამიანებს საშინლად ეშინიათ. ეს სასწრაფოა".

თეთრ სახლში ვარაუდობენ, რომ ბაიდენი კანონმდებლებს ვაშინგტონში დაბრუნებას და კონგრესში საგანგებო სესიის ჩატარებას სთხოვს, რათა ჩრდილოეთ კაროლინის დაზარალებულ რეგიონებს დახმარების დამატებითი ბიუჯეტი დაუმტკიცონ. "რუკიდან მთელი დასახლებებია ამოშლილი", - თქვა პირველ ოქტომბერს შტატის გუბერნატორმა როი კუპერმა.

ქარიშხალი "ჰელენი" ბოლო დღეებში ამერიკის რამდენიმე შტატს დაატყდა თავს. 160-ზე მეტი დაღუპული უმთავრესად ჩრდილოეთ კაროლინიდანაა, ასევე - სამხრეთ კაროლინიდან, ჯორჯიიდან, ფლორიდიდან, ტენესიდან და ვირჯინიიდან. "კარდაკარ დავდივართ, უნდა დავრწმუნდეთ რომ თითოეული ადამიანი უსაფრთხოდაა", - ამბობს ავრილ პინდერი, ჩრდილოეთ კაროლინაში ბანკომბის საგრაფოს მენეჯერი.

ასობით ადამიანი ამ ეტაპზე დაკარგულად მიიჩნევა. მაშველები 24 საათის განმავლობაში ურთულეს პირობებში მუშაობენ, ეძებენ დაკარგულებს, წმენდენ გზებს, მოსახლეობას აწვდიან საკვებსა და პირველადი საჭიროების ნივთებს. ხალხი ზოგჯერ საათობით რიგებში დგას, წყლისა და საკვების ასაღებად. რამდენიმე შტატის მილიონზე მეტი შენობა, რომელთა შორის საცხოვრებელი სახლებიც არის და ბიზნესებიც, ჯერ კიდევ ელექტროენერგიის გარეშე რჩება.

Photo Gallery:

"დებიმ" ამერიკის შტატებს წყალდიდობა და ნგრევა მოუტანა

შტორმი "დები", რომელიც ძლიერი წვიმითა და ქარიშხლის თანხლებით, ამერიკის სამხრეთ შტატებიდან ჩრდილოეთით გადაადგილდა, გზად წყალდიდობასა და ნგრევას ტოვებს. შტორმის ნარჩენებმა დღეს ჩრდილოეთ შტატებიც დააზარალა. ფოტოგალერეაში ნახავთ ფლორიდაში, ჯორჯიაში, ჩრდილოეთ და სამხრეთ კაროლინაში მომხდარ წყალდიდობებს.