ბედნიერება მოძრაობასა და უწყვეტ განვითარებაშია – თამარ ნიკურაძის გზა…

OK! ბათუმის სტუმარი ძლიერი, მიზანდასახული, მუდმივად მებრძოლი თამარ ნიკურაძეა – ქალი, რომელიც დარწმუნებულია, რომ ბედნიერება მოძრაობასა და უწყვეტ განვითარებაშია, რომლის სამყაროში სტაგნაცია არ არსებობს. არასოდეს ჩერდება, მისთვის ცხოვრება მუდმივი გამოცდაა, მუდმივი შემეცნება, მუდმივი მცდელობა იყოს იმაზე უკეთესი, ვიდრე გუშინ იყო. განუწყვეტელი ზრდა, მისი ძალა და კომპასია. როცა ვითარდები – შენი ძალა არ ილევა!

გაეცანით OK! ბათუმის მკითხველს…

მე გახლავართ დამწყები კონგლომერატი თამარ ნიკურაძე და ჩემი საქმიანობის სფერო ისეთივე მრავალფეროვანი და საინტერესოა, როგორც ცხოვრება. ეს არის სამი განსხვავებული მიმართულება, რომელსაც აერთიანებს ხარისხის, ენთუზიაზმისა და ზრდის ერთიანი ფილოსოფია.

Queen’s Academy – „ქუინს აკადემია“: ცოდნის სამეფოა, ოფიციალურად წელს გაიხსნა, თუმცა მისი ფესვები გაცილებით ძველია – ეს ამბავი, მრავალი წლის წინ, ერთი პატარა ოთახით, ერთი მაგიდით და ორი სკამით დაიწყო. ეს იყო მოკრძალებული, მაგრამ უდიდესი სიყვარულით სავსე დასაწყისი.  Queen’s Academy – „ქუინს აკადემია“ – არის ადგილი, სადაც მე ყველაზე მეტად მიყვარს ყოფნა, თქვენც შეგიყვარდებათ! ჩვენ ვქმნით გარემოს, სადაც ბარიერები ქრება და ახალი ენის შესწავლა აღარ არის გამოწვევა. ეს არის სივრცე, სადაც მოსწავლეები და სტუდენტები არა მხოლოდ სწავლობენ, არამედ ალაპარაკდებიან ისეთ ენებზე, როგორიცაა ინგლისური, ჩინური და იაპონური.

ჩვენი მისიაა, ცოდნა გავხადოთ ხელმისაწვდომი, საინტერესო და ეფექტური. გამომცემლობა „ტალანტარე“: სიტყვის ძალა ქველმოქმედების სამსახურში – პანდემიის რთულ პერიოდში შეიქმნა, როდესაც ინოვაცია და ურთიერთდახმარება სასიცოცხლოდ მნიშვნელოვანი გახდა. ვფიქრობ, ეს გახლავთ პირველი გამომცემლობა საქართველოში, რომელიც საქველმოქმედო მიზნებით შეიქმნა. ჩვენი საქმიანობა არის ხიდი კეთილ საქმესა და მაღალ ლიტერატურულ ხარისხს შორის. დღემდე, „ტალანტარე“ არის არაჩვეულებრივი წიგნების „სამშობიარო ადგილი“ – წიგნების, რომლებიც არა მხოლოდ კვებავს გონებას, არამედ ეხმარება მათ, ვისაც ყველაზე მეტად სჭირდება მხარდაჭერა. სწორედ ამ წარმატებამ და მოტივაციამ ჩაუყარა საფუძველი Queen’s Academy- „ქუინს აკადემიის“ შექმნას.  Luxury Stone – „ლაქშერი სთოუნი“: ოჯახური მემკვიდრეობა და სილამაზე ქვაში – ეს არის ჩვენი საოჯახო ბიზნესი, რომლის დამფუძნებელიც ჩემი შვილია, მე ვამაყობ, რომ  მისი დირექტორი ვარ. „ლაქშერი სთოუნი“ არის მარმარილო-გრანიტის საამქრო და იმპორტიორი. ჩვენ ვართ ხელოვანები, რომლებიც ბუნებრივ და ხელოვნურ ქვას სიცოცხლეს ვუბრუნებთ. ჩვენთან ნებისმიერი დიზაინის ნაკეთობა კეთდება. ჩვენ ვახორციელებთ უმაღლესი ხარისხის ბუნებრივი და ხელოვნური ქვის იმპორტს მსოფლიოს ისეთი წამყვანი ქვეყნებიდან, როგორებიცაა: ინდოეთი, თურქეთი, ჩინეთი, ირანი და ეგვიპტე.

მოგვიყევით თქვენს საქმიანობაზე. რა იყო ის ბიძგი, რომელმაც აღნიშნული გზა დაგაწყებინათ?

ამ მრავალფეროვანი გზის დაწყების მთავარი ბიძგი იყო შეუპოვარი სურვილი, შემექმნა ღირებული რამ, რასაც უნდა დაეტოვებინა კვალი.

პანდემიის გამოწვევა: გამომცემლობა „ტალანტარეს“ შემთხვევაში, ბიძგი იყო სოციალური პასუხისმგებლობა და რწმენა, რომ კრიზისის დროსაც კი, ხელოვნება და ქველმოქმედება გადამრჩენია. ცოდნის სიყვარული: „ქუინს აკადემიის“ ბიძგი იყო მარტივი, გამეზიარებინა ცოდნა და მიმეცა სხვებისთვის „ლაპარაკის“ საშუალება, რაც მათ კარს გაუღებდა მსოფლიოში. მომავლისთვის მშენებლობა: „ლაქშერი სთოუნის“ ბიძგი კი იყო ოჯახისთვის მომავლის მყარი საფუძვლის შექმნა და ჩემი შვილის მეწარმეობის მხარდაჭერა. ამ სამივე მიმართულებას ამოძრავებს ერთი ფილოსოფია: ნულიდან დაწყებული ოცნების რეალობად ქცევა, სადაც ხარისხი და ადამიანური ღირებულება უმნიშვნელოვანესია.

რა ხდის თქვენს საქმიანობას განსაკუთრებულს. რა არის თქვენი მოტივაციისა და შთაგონების წყარო?

ჩემი საქმიანობის განსაკუთრებულობა მდგომარეობს იმაში, რომ ის სცილდება უბრალო ბიზნესს – ეს არის უწყვეტი განვითარება და  მოძრაობა. ჩვენი შეთავაზებები არ არის მხოლოდ პროდუქტები, ეს არის საშუალებები იმისთვის, რომ ადამიანებმა საკუთარ ცხოვრებაში ხილული, ხელშესახები პროგრესი დაინახონ – იქნება ეს ახალ ენაზე ალაპარაკება, წიგნის გამოცემა თუ საკუთარი სახლის გალამაზება. ჩემი არსებობის მთავარი მიზანია მუდმივი განვითარებისკენ სწრაფვა. ეს არ არის მხოლოდ სურვილი, ეს არის აუცილებლობა. ვიცი, რომ როგორც კი გავჩერდები, ჩემი შესაძლებლობები მოძველდება. ჩემი შთაგონებაა დღევანდელი „მე“-ს დამარცხება ხვალინდელი „მე“-ს მიერ. რადგან ვიცი, რომ ბედნიერება მოძრაობასა და უწყვეტ განვითარებაშია, მე ვრჩები აქტიური, ცნობისმოყვარე და მზად ვარ ახალი გამოწვევებისთვის. ეს პირადი დისციპლინა არის ჩემი ბიზნესის ყველა სფეროს უხილავი ძრავა.

იმისთვის, რომ ნდობა და წარმატება მოიპოვო – საჭიროა…

ჩემი აზრით, იმისთვის რომ ნდობა და წარმატება მოიპოვო, საჭიროა იყო ერთგული, თავდადებული ადამიანი, გიყვარდეს ადამიანები და მაქსიმალურად ცდილობდე მოერგო მათ საჭიროებებს.  ბიზნესში ნდობა არის ვალუტა, ხოლო წარმატება არის შედეგი. ამ ორივეს მოპოვება მოითხოვს მიზანმიმართულ სტრატეგიასა და თანმიმდევრულობას.

ნდობა ქმნის საფუძველს, წარმატებას კი მიიღწევა ბაზარზე უნიკალური ღირებულების შექმნითა და მუდმივი ადაპტაციით. უნდა იცნობდეთ თქვენს კლიენტს: ზუსტად გესმოდეთ, რა პრობლემას უგვარებთ მათ. მუდმივად უნდა იყოთ მზად ბაზრის ცვლილებებზე სწრაფი რეაგირებისთვის და ინოვაციებისთვის. ხარისხი პირდაპირ კავშირშია ნდობასთან. ეფექტური კომუნიკაცია და მარკეტინგი: ნდობა არ არის საკმარისი, თუ ხალხმა არ იცის თქვენი არსებობის შესახებ.

რა გზავნილი გაქვთ ქალბატონებისათვის, რომლებიც ახლა იწყებენ საკუთარი გზის ძიებას?

ჩემო ძვირფასო ქალბატონებო,  მინდა, გაგიზიაროთ სამი ძირითადი პრინციპი, რომელიც თქვენი წარმატებული გზის საფუძველი გახდება: შეწყვიტეთ ლოდინი, დაიწყეთ მოქმედება. ხშირად, ჩვენ ველოდებით „იდეალურ მომენტს“ ან „სრულყოფილ ცოდნას“, მოქმედების დასაწყებად. გახსოვდეთ, ეს არის ხაფანგი. არ არსებობს „სწორი მომენტი“ – მომენტი არის ახლა! ნუ მისცემთ უფლებას შიშს ან ეჭვს, რომ თქვენი წარმატების დასაწყისი გადადოს. გახსოვდეთ: წარუმატებლობა არ არის შეცდომა, შეცდომა არის არაფრის კეთება.

ითხოვეთ დახმარება! ნუ ეცდებით „სუპერ ქალის“ როლის შესრულებას მარტო. წარმატებული ქალები ქმნიან ძლიერ ქსელებს, იზიარებენ პასუხისმგებლობას და აქტიურად იყენებენ მენტორების გამოცდილებას. თქვენი უმთავრესი ინვესტიცია არის თქვენივე თავი. ისწავლეთ ახალი უნარები, იკითხეთ, იყავით ცნობისმოყვარე და მიიღეთ გამოწვევები. გახსოვდეთ, ბედნიერება მოძრაობასა და უწყვეტ განვითარებაშია. სანამ წინ მიიწევთ, თუნდაც ნელი ნაბიჯებით, თქვენ წარმატებული ხართ.

როგორია თქვენი სამომავლო გეგმა? როგორ ხედავთ საკუთარ თავს რამდენიმე წელიწადში?

ჩემი მიზანი და სამომავლო გეგმა არის მდგრადი ზრდის ეკოსისტემის შექმნა, სადაც ყოველი მიმდინარე წარმატება საფუძველს უყრის კიდევ უფრო დიდ წამოწყებას. ჩემი უპირველესი მიზანია არსებული წარმატების გაღრმავება, ხოლო უმთავრესი ამოცანაა, გავამყარო და განვავითარო ის ბიზნესები, რომლებიც დღეს ასე მრავალფეროვნად წარმოვადგინე.

Queen’s Academy – ქუინს აკადემია მინდა გახდეს რეგიონში უცხო ენების სწავლების ეტალონი. ჩვენი მიზანია, არა მხოლოდ გავაფართოვოთ ენების ჩამონათვალი, არამედ დავნერგოთ ინოვაციური, ჰიბრიდული სწავლების მეთოდები. გამომცემლობა „ტალანტარე“-ს შემთხვევაში, გავაძლიეროთ ჩვენი საქველმოქმედო მისია და გავხადოთ „ტალანტარე“ კიდევ უფრო მძლავრი პლატფორმა, ახალი, ნიჭიერი ავტორებისთვის.

Luxury Stone – ის შემთხვევაში, გავაძლიეროთ ჩვენი პოზიციები იმპორტში, გავაფართოვოთ ბუნებრივი და ხელოვნური ქვის ასორტიმენტი და გავხდეთ ინოვაციური დიზაინისა და ხარისხის ბრენდი სამშენებლო სექტორში. რაც შეეხება სამომავლო გეგმებს, ჩემი მოტივაციის წყარო უწყვეტი განვითარებაა, ამიტომ ჩემი გეგმები მოიცავს ახალი ბიზნესების წამოწყებას სხვადასხვა სექტორში. ჩემი მიზანია, ინვესტიცია ჩავდო იდეებში, რომლებიც ქმნიან რეალურ ღირებულებას, ეხმაურებიან ბაზრის გამოუვლენელ საჭიროებებს.

რამდენიმე წელიწადში მე ვხედავ საკუთარ თავს, როგორც ლიდერსა და მენტორს, რომელიც არის მრავალფეროვანი ბიზნეს პორტფოლიოს სათავეში. ჩემი უდიდესი მიღწევა იქნება ძლიერი, განვითარებაზე ორიენტირებული გუნდის შექმნა, რომელიც სამყაროს უკეთესობისკენ შეცვლის და ბოლოს, ბედნიერება მოძრაობასა და ზრდაშია, რომელსაც უპირობო წარმატებისკენ მივყავართ!