nostal.ge ახალი ამბები 
საბერძნეთში უცხოელებისთვის ბინადრობისა და მუშაობის წესები 2026 წელს შეიცვალა. ახალი რეგულაციები შეეხო დასაქმებულებს, სტუდენტებსა და მაღალკვალიფიციურ სპეციალისტებს, ზოგიერთი კატეგორიის ბინადრობის ნებართვის მოქმედების ვადა გახანგრძლივდა, ზოგზე კი ავტომატური გაგრძელების რეჟიმი ამოქმედდა, გამარტივდა რიგი პროცედურები.
ამასთან, კვლავ მნიშვნელოვანია ფინანსური მოთხოვნები Digital Nomad-ისა და ფინანსურად დამოუკიდებელი პირებისთვის, ასევე Golden Visa-ს მოქმედი საინვესტიციო პირობები.
ცვლილებების დიდი ნაწილი განხორციელდა „ლეგალური მიგრაციის პოლიტიკის ხელშეწყობის შესახებ“ ახალი კანონის საფუძველზე.
მთავარი ცვლილებები მოკლედ
2026 წლის მთავარი სიახლეები ასეთია:
- გარკვეულ კატეგორიებზე, მათ შორის, დასაქმებასთან დაკავშირებულ ნებართვებზე, გამარტივდა და დაჩქარდა განახლების პროცედურები;
- უცხოელი დასაქმებულებისთვის დამსაქმებლის შეცვლასთან დაკავშირებული წესები უფრო მოქნილი გახდა;
- შემოვიდა ახალი Tech Visa და Talent Visa;
- გაიზარდა EU Blue Card-ის მოქმედების ვადა;
- სტუდენტური ბინადრობის ნებართვა შეიძლება მოიცავდეს სწავლის სრულ პერიოდს;
- სტუდენტებს სწავლის პარალელურად ნახევარ განაკვეთზე მუშაობისა და სწავლის დასრულების შემდეგ სამუშაოს მოძებნის შესაძლებლობა აქვთ;
- Digital Nomad-ისა და ფინანსურად დამოუკიდებელი პირებისთვის ფინანსური რესურსის მოქმედი მოთხოვნა თვეში €3500-ია;
- Golden Visa-სთვის კვლავ მოქმედებს €800 000, €400 000 და სპეციალურ შემთხვევებში €250 000-იანი საინვესტიციო ზღვარი.
მთავარი ცვლილება – ახალი კანონი ლეგალური მიგრაციის შესახებ
2026 წლის 6 თებერვალს ძალაში შევიდა კანონი №5275/2026 – „ლეგალური მიგრაციის პოლიტიკის ხელშეწყობის შესახებ“.
მისი ერთ-ერთი მთავარი მიზანია მიგრაციის ადმინისტრირების გამარტივება და უცხოელებისთვის გარკვეული პროცედურების დაჩქარება.
კანონი რიგ კატეგორიებზე ბინადრობის ნებართვის მოქმედების მინიმალურ ვადასაც განსაზღვრავს – ორი წლით.
გარკვეული სტაბილური კატეგორიებისთვის, მათ შორის, დასაქმებასთან დაკავშირებული ნებართვების შემთხვევაში, გათვალისწინებულია განახლების (ვადის გაგრძელება) უფრო მარტივი მექანიზმები, თუ არ არსებობს დაბრკოლებები საზოგადოებრივი წესრიგისა და უსაფრთხოების საკითხების მხრივ.
ამიტომ ახალი წესები არ ნიშნავს, რომ საბერძნეთში არსებული ყველა ტიპის ბინადრობის ნებართვა ავტომატურად გაგრძელდება. პირობები კვლავ კონკრეტულ კატეგორიაზეა დამოკიდებული.
დასაქმებულებისთვის დამსაქმებლის შეცვლა უფრო მარტივდება
ცვლილებები ეხება უცხოელი მუშაკების საბერძნეთში დასაქმების მიზნით მოწვევის წესებსაც.
განახლებული სისტემა უფრო მოქნილს ხდის უცხოელი დასაქმებულის კონკრეტულ დამსაქმებელთან დაკავშირებულ საკითხებს. ამასთან, უცხოელი მუშაკების დამსაქმებელთა წრეში შედიან დროებითი დასაქმების კომპანიებიც.
განსაკუთრებული პროცედურებია გათვალისწინებული მსხვილი პროექტებისა და სტრატეგიული ინვესტიციებისთვის საჭირო უცხოელი მუშაკების მოსაზიდად.
ეს ცვლილებები განსაკუთრებით მნიშვნელოვანია მათთვის, ვინც უკვე ცხოვრობს და მუშაობს საბერძნეთში და სამსახურის შეცვლას გეგმავს.
Tech Visa და Talent Visa – ახალი შესაძლებლობები სპეციალისტებისთვის
საბერძნეთი ცდილობს ქვეყანაში მეტი მაღალკვალიფიციური უცხოელი სპეციალისტი მიიზიდოს.
2026 წელს ამოქმედდა ახალი ეროვნული კატეგორიები – Tech Visa და Talent Visa.
Tech Visa, ძირითადად, ტექნოლოგიური სფეროს სპეციალისტებისთვისაა შექმნილი და საბერძნეთის სტარტაპების ეკოსისტემას უკავშირდება.
Talent Visa კი პროფესიული გამოცდილების მქონე მაღალკვალიფიციური უცხოელებისთვისაა განკუთვნილი.
ცვლილებები შეეხო ევროკავშირის Blue Card-საც, რომლის მოქმედების ვადა გაიზარდა.
ეს მიმართულება განსაკუთრებით საინტერესოა IT-სპეციალისტებისთვის, ინჟინრებისთვის, მკვლევრებისა და სხვა პროფესიის მაღალკვალიფიციური ადამიანებისთვის.
სტუდენტებს სწავლის შემდეგ საბერძნეთში დარჩენის მეტი შესაძლებლობა აქვთ
ცვლილებები შეეხო საბერძნეთში სასწავლებლად ჩასულ უცხოელ სტუდენტებსაც.
ახალი წესებით სტუდენტური ბინადრობის ნებართვა შეიძლება გაიცეს სასწავლო პროგრამის ხანგრძლივობის შესაბამისი ვადით.
სტუდენტებს სწავლის პარალელურად აქვთ ნახევარ განაკვეთზე მუშაობის შესაძლებლობაც (მაქსიმუმ 20 სთ კვირაში).
კიდევ ერთი მნიშვნელოვანი ცვლილებაა სწავლის დასრულების შემდეგ ქვეყანაში დარჩენის შესაძლებლობა სამუშაოს მოსაძებნად ან პროფესიული საქმიანობის დასაწყებად.
ეს იმას ნიშნავს, რომ სტუდენტური ბინადრობის ნებართვა მხოლოდ სწავლის პერიოდზე აღარ არის ორიენტირებული და გარკვეულ შემთხვევებში უცხოელს საბერძნეთის შრომის ბაზარზე გადასვლის შესაძლებლობასაც აძლევს.
Digital Nomad: მინიმალური შემოსავალი €3500 თვეში
საბერძნეთში Digital Nomad-ის (ციფრული მომთაბარე) სტატუსით ცხოვრების მსურველებისთვის ფინანსური მოთხოვნა თვეში €3500 რჩება.
ეს არის ძირითადი განმცხადებლისთვის საჭირო მინიმალური სტაბილური შემოსავალი.
თუ განმცხადებელი მეუღლესთან ერთად ცხოვრობს, მოთხოვნა 20%-ით იზრდება, ხოლო თითოეული ბავშვის შემთხვევაში – კიდევ 15%-ით.
ამგვარად, ძირითადი განმცხადებლისთვის საჭირო შემოსავალი თვეში €3500-ით განისაზღვრება, მეუღლესთან ერთად – €4200-ით, ხოლო მეუღლესა და ერთ შვილთან ერთად – €4725-ით.
ფინანსურად დამოუკიდებელი პირებისთვისაც €3500
მნიშვნელოვანია კიდევ ერთი ცვლილება, რომელიც მათ ეხებათ, ვისაც სურს საბერძნეთში იცხოვროს საკუთარი ფინანსური რესურსებით.
ძველ მასალებში ჯერ კიდევ შეიძლება შეგხვდეთ €2000-იანი ყოველთვიური შემოსავლის მოთხოვნა, თუმცა ეს უკვე აღარ არის მოქმედი ძირითადი ფინანსური მაჩვენებელი.
მოქმედი წესებით საკმარისი ფინანსური რესურსის მოთხოვნა ძირითადი განმცხადებლისთვის არის თვეში €3500.
მეუღლის შემთხვევაში თანხა 20%-ით იზრდება, ხოლო თითოეული ბავშვის შემთხვევაში – 15%-ით.
ამიტომ ინფორმაციის წყაროდ ძველი სტატიების გამოყენება რომ აიცილოთ თავიდან, შეამოწმეთ მათი გამოქვეყნების თარიღი და მოიძიეთ შესაბამისი წესების განახლებული ვერსია.
Golden Visa: €250 000 ყველა შემთხვევაში აღარ არის საკმარისი
საბერძნეთის Golden Visa-ს პროგრამაში მოქმედი ძირითადი საინვესტიციო ზღვრებია:
- €800 000 – ატიკის რეგიონში, თესალონიკში, მიკონოსსა და სანტორინზე, ასევე, კუნძულებზე, სადაც მოსახლეობის რაოდენობა 3100-ს აღემატება;
- €400 000 – სხვა ტერიტორიების დიდ ნაწილში;
- €250 000 – კანონით განსაზღვრულ სპეციალურ შემთხვევებში.
€250 000-იანი კატეგორია, მაგალითად, შეიძლება შეეხოს გარკვეულ უძრავ ქონებას, რომლის გამოყენების დანიშნულებაც საცხოვრებლად იცვლება, ან სპეციალურ ობიექტებს, რომლებიც კანონით დადგენილ მოთხოვნებს აკმაყოფილებს.
ამიტომ ფრაზა „საბერძნეთის Golden Visa €250 000-დან“ სრულ სურათს არ ასახავს – ამ თანხით ბინადრობის მიღება მხოლოდ კონკრეტულ შემთხვევებშია შესაძლებელი.
120 კვ. მ და მოკლევადიანი გაქირავების შეზღუდვა
€400 000-იანი და €800 000-იანი კატეგორიებისთვის მოქმედებს დამატებითი მოთხოვნა: შესაბამისი საცხოვრებელი უძრავი ქონების ფართობი მინიმუმ 120 კვ. მ უნდა იყოს.
ასევე, Golden Visa-ს პროგრამის ფარგლებში შეძენილი გარკვეული უძრავი ქონების მოკლევადიანი გაქირავება აკრძალულია, მათ შორის, Airbnb-ის მსგავსი პლატფორმების საშუალებით.
ამიტომ ქონების შეძენამდე მნიშვნელოვანია არა მხოლოდ საინვესტიციო თანხის, არამედ ქონების ფართობის, მდებარეობისა და შემდგომი გამოყენების წესების შემოწმებაც.
რა უნდა გაითვალისწინონ საბერძნეთში მცხოვრებმა ქართველებმა
2026 წლის ცვლილებები განსაკუთრებით მნიშვნელოვანია იმ ქართველებისთვის, რომლებიც საბერძნეთში მუშაობენ, სწავლობენ ან ქვეყანაში საკუთარი ფინანსური რესურსებით ცხოვრობენ.
ძველი ინფორმაციის გამოყენებისას ყურადღება უნდა მიექცეს რამდენიმე საკითხს:
- კონკრეტულად რომელ კატეგორიას მიეკუთვნება თქვენი ბინადრობის ნებართვა;
- რამდენია მისი მოქმედების ვადა;
- შეიცვალა თუ არა ფინანსური მოთხოვნა;
- რა პირობებით შეგიძლიათ დამსაქმებლის შეცვლა;
- გაქვთ თუ არა მუშაობის უფლება;
- რა შესაძლებლობა გაქვთ სწავლის დასრულების შემდეგ;
- Golden Visa-ს შემთხვევაში, აკმაყოფილებს თუ არა კონკრეტული ქონება მოქმედ მოთხოვნებს.
საბერძნეთში ბინადრობის ნებართვის უნივერსალური ტიპი არ არსებობს. სამუშაო, სწავლა, ოჯახური მდგომარეობა, ფინანსური დამოუკიდებლობა, დისტანციური საქმიანობა და ინვესტიცია სხვადასხვა სამართლებრივ საფუძველს წარმოადგენს და თითოეულს საკუთარი პირობები აქვს.
ამიტომ, განაცხადის შეტანამდე მნიშვნელოვანია არა მხოლოდ სტატიის გამოქვეყნების თარიღის, არამედ კონკრეტული კატეგორიისთვის მოქმედი წესებისა და მოთხოვნების გადამოწმება.
2026 წლის ცვლილებების მთავარი მიზანი პროცედურების გამარტივებაა, რათა ლეგალური მიგრაციის სისტემა უფრო მოქნილი გახდეს, თუმცა კონკრეტული მოთხოვნები კვლავ ბინადრობის ნებართვის ტიპზეა დამოკიდებული.
ნინო ბაჯელიძე
