გალის სასამართლომ საქართველოს მოქალაქეს „საზღვრის უკანონო გადაკვეთისთვის“ ერთწლიანი პატიმრობა მიუსაჯა

ოკუპირებული აფხაზეთის „გენერალურმა პროკურატურამ“ განაცხადა, რომ გალის სასამართლომ საქართველოს მოქალაქე გიორგი ცატავა თბილისის მიერ კონტროლირებადი ტერიტორიიდან „სახელმწიფო საზღვრის უკანონო გადაკვეთაში“ დამნაშავედ ცნო და ერთი წლით თავისუფლების აღკვეთა მიუსაჯა. განაჩენი 19 მაისს მოსამართლე კ.ნ. ლასურიამ გამოიტანა.

დე ფაქტო უწყების ინფორმაციით, ცატავა აფხაზეთში თბილისის მიერ კონტროლირებადი ტერიტორიიდან 2025 წლის 12 აგვისტოს, მდინარე ენგურის გავლით, შევიდა, 2026 წლის 15 აპრილს დააკავეს და იმავე დღეს გალის დროებითი დაკავების იზოლატორში მოათავსეს.

საქართველოს სახელმწიფო უსაფრთხოების სამსახურს (სუსი) საოკუპაციო ძალების მიერ საქართველოს მოქალაქის დაკავებასთან დაკავშირებით კომენტარი ჯერ არ გაუკეთებია.  

2025 წლის ყოველწლიურ ანგარიშში სახელმწიფო უსაფრთხოების სამსახურმა განაცხადა, რომ წლის განმავლობაში ოკუპირებულ აფხაზეთში უკანონო დაკავების 40 შემთხვევა დაფიქსირდა. ანგარიშში ასევე აღნიშნულია, რომ 2025 წლის ბოლოსთვის ოკუპირებულ ტერიტორიებზე უკანონო პატიმრობაში საქართველოს 15 მოქალაქე იმყოფებოდა.

This post is also available in: