გასართობი შოუ სუპერბოულის სტილში - რა მოხდება მსოფლიო ჩემპიონატზე?

მსოფლიო ჩემპიონატის ისტორიაში პირველად, ტურნირის ფინალურ მატჩში, სუპერბოულის მსგავსად, შესვენების დროს გასართობი შოუ გაიმართება.

FIFA-ს პრეზიდენტმა, ჯანი ინფანტინომ განაცხადა, რომ მსოფლიოს უდიდესი სპორტული მოვლენა იმსახურებს ასეთ გრანდიოზულ შოუს, რაც ფეხბურთის ისტორიაში უმნიშვნელოვანეს ეტაპად იქცევა.

აღსანიშნავია, რომ შოუს მომზადებაში მნიშვნელოვან წვლილს შეიტანს ბრიტანული როკჯგუფი Coldplay, თუმცა ეს ფაქტი ჯერ ოფიციალურად დადასტურებული არ არის. FIFA-ს მხრიდან უკვე დადასტურებულია, რომ ჯგუფის წევრები, კრის მარტინი და ფილ ჰარვი, შოუსთვის შემსრულებლების შერჩევის პროცესში მიიღებენ მონაწილეობას.

ფეხბურთის ტრადიციული წესებით, შესვენება 15 წუთს გრძელდება, ხოლო სუპერბოულში, სადაც მსგავსი შოუები უკვე დამკვიდრებული პრაქტიკაა, ამისთვის 30 წუთია განსაზღვრული. FIFA ჯერჯერობით დუმს იმაზე, განიცდის თუ არა ცვლილებას მატჩის სტრუქტურა და გაიზრდება თუ არა ტაიმებს შორის დრო.

მომავალი მსოფლიო ჩემპიონატის ფინალი 2026 წლის 19 ივლისს, ნიუ ჯერსიში გაიმართება.