netgazeti 
05.10.2026
გიორგი დავითაძის მამა მსჯავრდებულის მიერ „გაურკვეველი საგნის“ გადაყლაპვის შესახებ პენიტენციური სამსახურის განცხადებას ეხმაურება და სახალხო დამცველს რეაგირებისკენ მოუწოდებს.
„ფორმულასთან“ საუბრისას მან გამოთქვა ვარაუდი, რომ შესაძლოა გიორგი დავითაძეზე ციხეში ზეწოლა გრძელდება.
დედა, ირმა დავითაძე ამბობს, უკვე მივიდა ციხესთან და დარეკა სახალხო დამცველის აპარატში. ირმა დავითაძე ითხოვს წარმომადგენლის ადგილზე მისვლას.
„რადგან ასეთი პროტესტი აქვს ჩემს შვილს, ესე იგი, კიდევ გრძელდება ეს ზეწოლები ალბათ ციხეში და კიდევ მიდის ალბათ შეურაცხყოფები. გამოვიდა სახალხო დამცველის წარმომადგენელი დღეს დაგვირეკა: რომ ძალიან ბრძოლისუნარიანია, მზადაა გაგრძელოს ბრძოლა და ახლა ვიგებთ ასეთ ინფორმაციებს. ესე იგი, ისევ და ისევ რაღაც ფსიქოლოგიური ზეწოლები ხდება მასზე. […]
მივმართავ სახალხო დამცველს, უზრუნველყოს და დროულად მიიღოს შესაბამისი ზომები, გადაყვანილ იქნას ჩემი შვილი „ვივამედში“, რომ დაცული იყოს ჩემი შვილის ჯანმრთელობა. მე არ ვიცი ხვალ და ზეგ ციხეში რა მდგომარეობა ექნება. კატეგორიულად მოვითხოვ. შევიდეს სახალხო დამცველი, გაარკვიოს და გამოიტანოს ამბავი და უზრუნველყოს ჩემი შვილის ჯანმრთელობის დაცვა… მთელ პასუხისმგებლობას ვაკისრებ ამ ხელისუფლებას და სასჯელაღსრულების დეპარტამენტს“, – ამბობს გიორგი დავითაძის მამა „ფორმულასთან“.
სპეციალური პენიტენციური სამსახური აცხადებს, რომ დღეს, 4 ოქტომბერს 21:12 სთ-ზე მსჯავრდებულმა გიორგი დავითაძემ, რომელიც ბადრაგს სექსუალურ ძალადობაში ადანაშაულებს, „გაურკვეველი მცირე საგანი“ გადაყლაპა.
უწყების განცხადებაში ნათქვამია, რომ მან ეს გააკეთა ციხის თანამშრომლის თვალწინ, „დემონსტრაციულად“. უწყება აცხადებს, რომ ჯანმრთელობის მდგომარეობის შემდგომი მონიტორინგის მიზნით მას „ვივამედში“ გადაყვანა შესთავაზეს, რაზეც უარი თქვა.
პატიმარი გიორგი დავითაძე აცხადებს, რომ ციხეში ბადრაგებმა გააუპატიურეს. ამ საკითხზე მან სააპელაციო სასამართლოში გამართულ სხდომაზე ისაუბრა. მისი თქმით, კამერის ჩანაწერში ჩანს აღნიშნული ფაქტი და რომ დეესკალაციის საკანში ამ დროს 10 ადამიანი იმყოფებოდა.
დავითაძის განცხადებით, ექსპერტიზების მოთხოვნის შემდეგ, მასზე წარმოუდგენელი ზეწოლა დაიწყო. პატიმარი ამბობს, რომ სუიციდის მცდელობა ჰქონდა.
სპეციალური პენიტენციური სამსახური კატეგორიულად უარყოფს გიორგი დავითაძის განცხადებას. უწყებამ კადრებიც გაავრცელა და თქვა, რომ დეესკალაციის საკანში გადაყვანისას მსჯავრდებული ექვემდებარება შემოწმება – დათვალიერებას, რაზეც დავითაძემ „კატეგორიული უარი განაცხადა და დაიწყო დაწესებულების თანამშრომელთა სიტყვიერი შეურაცხყოფა“.
უწყების პოზიციით, „მხოლოდ ამის შემდეგ, მათზე დაკისრებული მოვალეობის შესრულების მიზნით, დაწესებულების თანამშრომლებმა იძულებით ჩაუტარეს შემოწმება მსჯავრდებულს, რაც განხორციელდა სხეულზე ელექტროდეტექტორის გამოყენებით“.
დავითაძის დედა აცხადებს, რომ გავრცელებული ვიდეომასალა სრული არაა და მას ნანახი აქვს 5 ფაილი, 20 წუთამდე კადრები.
მსჯავრდებულის ოჯახის წევრებმა 3 ოქტომბერს რუსთავის მე-6 პენიტენციურ დაწესებულებასთან აქცია გამართეს და მოითხოვეს, სრულად და ხმით გასაჯაროვდეს ვიდეოკადრები. ოჯახი ასევე ითხოვს ციხის უფროსის, შოთა ტრაპაიძის გადადგომასა და ამ საქმეზე მიუკერძოებელი გამოძიების ჩატარებას. საქმეს სახალხო დამცველის აპარატიც სწავლობს.
