ევროკავშირი თვლის, რომ უკრაინაში სამშვიდობო შეთანხმების მიღწევისთვის კვლავ “ბევრი მუშაობაა” საჭირო

ეს ბრიუსელში განაცხადა ევროკომისიის სპიკერმა პაულა პინიომ მას შემდეგ, რაც აშშ-ის პრეზიდენტმა დონალდ ტრამპმა რუსეთთან „მთელი ევროპის“ მონაწილეობით შეთანხმების მიღწევის შესახებ გააკეთა განცხადება.
პინიომ თქვა, რომ “ამისთვის ბევრი მუშაობაა საჭირო და, უპირველეს ყოვლისა, საჭიროა კეთილი ნება იმ მხარისგან, ვინც პირველმა დაიწყო ომი” და დასძინა: “ცხადია, ევროკავშირის გადასაწყვეტია ის საკითხები, რომლებიც მის უსაფრთხოებაზე ახდენს გავლენას”.
აშშ-ის პრეზიდენტმა დონალდ ტრამპმა, რაიმე დეტალების გარეშე განაცხადა, რომ იქნება „დიდი და მშვენიერი შეთანხმება", რომელიც მხოლოდ უკრაინას არ მოიცავს და შესაძლოა, მთელ ევროპას შეეხოს. ეს ტრამპმა თქვა რუსეთის პრეზიდენტის წარმომადგენელ კირილ დმიტრიევთან შეხვედრის შემდეგ. დმიტრიევი იყო რუსეთის დელეგაციის შემადგენლობაში, რომელიც უკრაინის დელეგაციასთან ერთად, 5 ნოემბერს თეთრ სახლში აშშ-ის პირველმა ლედიმ მელანია ტრამპმა მიიღო. დელეგაციების იქ ჩასვლის მიზანი იყო პირველი ლედის შუამავლობით უკრაინის ქალაქ ოლეშკიში ოქტომბრის ბოლოს ჩატარებული ცალკეული ჰუმანიტარული ოპერაციის შეჯამება.