radiotavisupleba ახალი ამბები 
დანიამ და ევროკავშირის კიდევ ოთხმა ქვეყანამ მიმდინარე კვირაში შეათანხმეს ევროკავშირის გარეთ მდებარე სახელმწიფოს ტერიტორიაზე მიგრანტთა „დაბრუნების ცენტრების“ მოდელი და იმედი გამოთქვეს, რომ იქ მიგრანტების გაგზავნას უკვე 2027 წლიდან შეძლებენ. ამის შესახებ Associated Press-ი იუწყება ოფიციალურ მონაცემებზე დაყრდნობით.
სააგენტო აღნიშნავს, რომ გადაწყვეტილების შესახებ ცნობილი გახდა კოპენჰაგენში გამართული ერთდღიანი შეხვედრის შედეგების მიხედვით. AP ამ ნაბიჯს უწოდებს მორიგ ეტაპს იმ ძალისხმევის ფარგლებში, რომელსაც ევროკავშირის ქვეყნები მიმართავენ იმ პირების მესამე ქვეყნებში გაგზავნისთვის, რომლებსაც უარი ეთქვათ თავშესაფრის მინიჭებაზე.
„ჩვენ მივემართებით იმისკენ, რაც არსებითად წარმოადგენს თავშესაფრის მინიჭების საერთო-ევროპული სისტემისა და მიგრაციის რეგულირების ფუნდამენტურ ტრანსფორმაციას“, განაცხადა პარასკევს დანიის იმიგრაციისა და ინტეგრაციის მინისტრმა მორტენ ბედსკოვმა. ის ჟურნალისტების წინაშე გამოვიდა გერმანიის, ნიდერლანდის, ავსტრიისა და საბერძნეთის კოლეგებთან ერთად.
აღნიშნული ხუთი ევროპული ქვეყანა მოლაპარაკებებს აწარმოებს - უპირატესად აფრიკის სახელმწიფოების მთავრობებთან - განთავსების შესაძლო ადგილების შესახებ და ამ პროექტის ინიციატორად გამოდის მთელი ევროკავშირისთვის, აღნიშნავს AP.
უფლებადამცველმა ორგანიზაციებმა გააკრიტიკეს მიგრანტების მესამე ქვეყნების ტერიტორიაზე არსებულ ცენტრებში ან ციხეებში დეპორტაციის გეგმები და განაცხადეს, რომ ევროპის სახელმწიფოებს არ შეუძლიათ ამ ადგილებში მათი უფლებების დაცვის გარანტირება.
მორტენ ბედსკოვმა უარყო მტკიცება იმის შესახებ, რომ „დაბრუნების ცენტრები“ მხოლოდ ევფემიზმია დაკავებისა და დეპორტაციის ცენტრების აღსანიშნავად, და განაცხადა, რომ ამ ცენტრების მუშაობას თვალყურს ადევნებენ მიგრაციის საერთაშორისო ორგანიზაცია და გაეროს ლტოლვილთა უმაღლესი კომისარიატი (UNHCR).
გაეროს ლტოლვილთა უმაღლეს კომისარიატში Associated Press-ს განუცხადეს, რომ მათთვის „არ მიუმართავთ ასეთი წინადადების დეტალების გაცნობით“, რის გამოც სამმართველო „ვერ გააკეთებს კომენტარს ზომებზე, რომლებიც განიხილება, ან იმაზე, თუ რაში შეიძლება მდგომარეობდეს UNHCR-ის პოტენციური როლი“.
მიგრაციის საერთაშორისო ორგანიზაციაში (IOM) სააგენტოს განუცხადეს, რომ გადაწყვეტილება „დაბრუნების ცენტრების“ მუშაობაში IOM-ის შესაძლო როლის შესახებ ჯერ არ არის მიღებული. „განხილვები წინასწარ ხასიათს ატარებს“, ხოლო თავად IOM-მა მხოლოდ „ტექნიკური კონსულტაციები გაუწია ევროკავშირის ზოგიერთ წევრ ქვეყანას უსაფრთხოების გარანტიებსა და ოპერაციულ ასპექტებთან დაკავშირებით“, აღნიშნეს ორგანიზაციაში.
მიუხედავად იმისა, რომ ევროპელ მინისტრებს არ დაუზუსტებიათ, კონკრეტულად რომელი მესამე ქვეყნები განიხილება პარტნიორებად, ბედსკოვმა განაცხადა, რომ პირველი შეთანხმების დადება 2027 წლის დასაწყისთვის იგეგმება.
ივნისში ევროპელმა კანონმდებლებმა კენჭი უყარეს იმას, რომ ევროკავშირის წევრ სახელმწიფოებს დაერთოთ ნება შექმნან ცენტრები გაერთიანების ფარგლებს გარეთ - დამოუკიდებლად ან მცირე კოალიციების შემადგენლობაში - და გაგზავნონ იქ პირები, რომლებსაც უარი ეთქვათ თავშესაფრის მინიჭებაზე, იმის სანაცვლოდ, რომ ისინი სამშობლოში გააგზავნონ.
Associated Press-ი ასევე წერს, რომ ჯერ კიდევ გაურკვეველი რჩება, კონკრეტულად რას მიიღებენ ევროკავშირის სახელმწიფოებთან მოლაპარაკებების მწარმოებელი ქვეყნები იმ მიგრანტების მიღების სანაცვლოდ, რომლებსაც ევროპაში უარი ეთქვათ თავშესაფარზე.
