ევროპარლამენტმა სომხეთთან ვაჭრობის ლიბერალიზაციის დროებითი ზომები დაამტკიცა

ეს არის შეთანხმება დროებითი ზომების შესახებ, რომელიც სომხეთმა ევროკავშირის საბჭოსთან 3 სექტემბერს შეათანხმა. მისი ფორმალური დასახელებაა „ავტონომიური სავაჭრო ზომები“ (ATM).

ევროკავშირში სომხეთის ელჩმა ტიგრან ბალაიანმა ევროპარლამენტის გადაწყვეტილებას უწოდა „კიდევ ერთი მნიშვნელოვანი ნაბიჯი სომხეთსა და ევროკავშირს შორის პარტნიორობის გაღრმავების გზაზე“.

• ევროპარლამენტის 15 სექტემბრის სესიას 671 დეპუტატი ესწრებოდა;
• მათგან 583-მა - 86%-მა - მხარი დაუჭირა ცვლილებებს;
• წინააღმდეგ 49 წავიდა, ხოლო 39-მა თავი შეიკავა.

ამ გადაწყვეტილებით, ევროკავშირში მიწოდებული სომხური საქონლის დაახლოებით 80%-ის მიმართ გაუქმდება იმპორტის საბაჟო გადასახადები, - ეს ზომა კი ორი წლის განმავლობაში იმოქმედებს.

ევროპული ტარიფები არ იმოქმედებს სომხური ახალი ბოსტნეულის, ხილისა და მცენარეების 99%-ზე, რომლებიც მანამდე რუსეთში გაჰქონდათ, ასევე სომხეთიდან იმპორტირებული სასმელებისა და ალკოჰოლის 91%-ზე.

დამტკიცებული ზომები მიზნად ისახავს ევროკავშირსა და სომხეთს შორის სავაჭრო კავშირების განმტკიცებასა და ევროკავშირის მიერ ერევნის მხარდაჭერას, - მის წინააღმდეგ მოსკოვის დე ფაქტო ემბარგოს დაწესების ფონზე.

• რუსეთმა სომხეთიდან იმპორტირებულ რძის პროდუქტებზე, ბოსტნეულზე, ხილზე, ყვავილებზე, ალკოჰოლზე, წყალსა და თევზის პროდუქციაზე შეზღუდვები დააწესა;
• ეს ნაბიჯები მოსკოვმა გადადგა ევროკავშირთან სომხეთის დაახლოების გეგმების შესახებ პრემიერ-მინისტრ ნიკოლ ფაშინიანის განცხადებების ფონზე;
• რუსეთის პრეზიდენტი ვლადიმირ პუტინი ერევნისგან მოითხოვს, სწრაფად მიიღოს გადაწყვეტილება ევროკავშირში გაწევრიანების საკითხში, რათა მოსკოვმა შეძლოს გაგება, თუ „როგორ განავითაროს ურთიერთობები სამომავლოდ“.