netgazeti 
ევროპის საბჭოს გენერალური მდივანი ალენ ბერსე აცხადებს, რომ დემოკრატიის შემაშფოთებელი უკუსვლა ძირს უთხრის საქართველოს, როგორც ევროპის საბჭოს წევრის მიერ ნაკისრ ვალდებულებებს.
საქართველოში არსებულ ვითარებაზე და ხელისუფლების მიერ ოპოზიციური პარტიების აკრძალვის განზრახვაზე ბერსეს ევროპის საბჭოს ადგილობრივ და რეგიონულ ხელისუფალთა კონგრესის სხდომაზე ჰკითხეს.
„საქართველოს დემოკრატიის უკუსვლა — ჩვენ ასე ვუწოდებთ — ნამდვილად შემაშფოთებელია. ჩვენ ვდგავართ შემზღუდველი კანონმდებლობის, სამოქალაქო სივრცის შევიწროებისა და ოპოზიციაზე ზეწოლის წინაშე და ყველა ეს ელემენტი ძირს უთხრის პოლიტიკურ პლურალიზმს, ისევე როგორც ქვეყნის, როგორც ევროპის საბჭოს წევრის ვალდებულებებს.
რაც შეეხება კონკრეტულად 5 ოპოზიციური პარტიის აკრძალვის საქმეს, ბერსეს თქმით, მან გამოხატა თავისი შეშფოთება, თუმცა სასამართლოს განაჩენის წინასწარგანჭვრეტის გარეშე:
„რადგან არასდროს უნდა დაგვავიწყდეს, რომ ჩვენ კანონის უზენაესობის პრინციპზე ვართ დაფუძნებული. ეს კი ნიშნავს, რომ წევრმა სახელმწიფოებმა უნდა დაიცვან ადამიანის უფლებათა კონვენცია, ასევე სასამართლოების, მათ შორის ადამიანის უფლებათა ევროპული სასამართლოს, პრეცედენტული სამართალი. ჩემი აზრით, ეს იმას ნიშნავს, რომ ამ საკითხებთან დაკავშირებული ბევრი ელემენტი საბოლოოდ ჩვენს სასამართლოებში აღმოჩნდება ან შესაძლოა, განხილულ იქნას. ამიტომ, მეც ვასრულებ ჩემს მოვალეობას ისე, რომ არ შევარყიო სასამართლოს პოზიცია. მაგრამ ამის თქმით, შედეგის წინასწარ განჭვრეტის გარეშე, მე მოვუწოდე მმართველ უმრავლესობას პლურალიზმის დაცვისკენ“, – განაცხადა ბერსემ.
მან „ქართულ ოცნებას“ შეახსენა, რომ პარტიის გაუქმება მოითხოვს დამაჯერებელ დასაბუთებას და ასევე, აუცილებლობისა და პროპორციულობის პრინციპების მკაცრ დაცვას.
ევროპის საბჭოს გენერალურმა მდივანმა ხაზი გაუსვა, რომ ის ყოველთვის ცდილობდა დიალოგში ჩართულობას და და ჰქონდა მჭიდრო კონტაქტი საქართველოს ხელისუფლებასთან.
„ბოლოს სექტემბერში, ნიუ-იორკში, პრემიერ-მინისტრ კობახიძესთან საქართველოს დემოკრატიული უკუსვლა განვიხილე და ხაზი გავუსვი ქვეყნის ვალდებულებების პატივისცემის მნიშვნელობას. როგორც ყველამ ვიცით, ევროპის საბჭო რჩება ჩართული თქვენი როლით, კონგრესის როლით, საპარლამენტო ასამბლეის როლით. ასევე, მინდა ვახსენო ვენეციის კომისია, რომელმაც ახლახან გასცა სახელმძღვანელო მითითებები შემზღუდველ კანონმდებლობასთან დაკავშირებით და აგრძელებს სასამართლო გადაწყვეტილებების აღსრულების მხარდაჭერას. ვფიქრობ, დიალოგმა ხელშესახებ პროგრესამდე უნდა მიგვიყვანოს. ამ დროისთვის, სიტუაცია ძალიან რთულია.
იცით, ევროპის საბჭოს წევრობა არ ნიშნავს უბრალოდ ქვეყნების კლუბის წევრობას. ეს ნიშნავს ვალდებულებების მაღალი დონის აღიარებას, რომელიც ეფუძნება ადამიანის უფლებათა ევროპულ კონვენციას, და ასევე ნიშნავს სასამართლოების გადაწყვეტილებების აღსრულების ვალდებულების აღებას. ეს არის საკვანძო ელემენტი, თუმცა ამას დრო სჭირდება“, — განაცხადა ბერსემ.
მანამდე, ევროპის საბჭოს გენერალური მდივნის აზრით, შესაძლებელია თბილისთან მუშაობა დიალოგის საფუძველზე.
საკონსტიტუციო სასამართლოში ოპოზიციური პარტიების აკრძალვის სარჩელის განხილვის დაწყებამდე ალენ ბერსემ განცხადება გაავრცელა და „ქართულ ოცნებას“ მოუწოდა, დაიცვას პოლიტიკური პლურალიზმი, შეინარჩუნოს სივრცე პოლიტიკური ოპოზიციისთვის.
ევროსაბჭოს გენერალური მდივანი „ოცნებას: დაიცავით პოლიტიკური პლურალიზმი
