ერთა ლიგა: საქართველოს ნაკრებმა ნავსი ვერ გატეხა – უკრაინასთან ისევ ვერ მოიგო (ვიდეო)

საქართველოს ნაკრებმა ერთა ლიგის მეორე ტურში უკრაინის ნაკრებს ბორის პაიჭაძის სახელობის „დინამოს“ სტადიონზე უმასპინძლა და შეხვედრა ფრედ, 0:0 დაასრულა. „ჯვაროსნებმა“ რამდენიმე კარგი საგოლე მომენტი შექმნეს, თუმცა უკრაინელთა მეკარის – ანატოლი ტრიუბინის დამაჯერებელი თამაშის შედეგად ანგარიში უცვლელი დარჩა.

ამ მატჩში საქართველოს ნაკრებს ახალი მთავარი მწვრთნელი – რამაზ სვანაძე გაუძღვა.

სვანაძემ ძირითად შემადგენლობაში რამდენიმე ლიდერი დააბრუნა და გუნდი 3-5-2 განლაგებით გამოიყვანა მოედანზე. სასტარტო შემადგენლობაში იყვნენ ხვიჩა კვარაცხელია, გიორგი ჩაკვეტაძე, ოთარ კიტეიშვილი, გიორგი წიტაიშვილი და ჟორჟ მიქაუტაძე.

საქართველო უფრო აქტიური იყო, მაგრამ გოლი ვერ გაიტანა

პირველივე ტაიმში საქართველოს ნაკრები შეტევაში უფრო აქტიურად გამოიყურებოდა და უკრაინის კართან რამდენიმე მწვავე ეპიზოდი შექმნა.

მე-15 წუთზე ხვიჩა კვარაცხელიამ საჯარიმო სახიფათოდ შეასრულა, თუმცა ბურთი კარს ააცილა.

რამდენიმე წუთში კი საქართველოს გოლის გატანის კიდევ უფრო რეალური შანსი ჰქონდა, თუმცა გიორგი ჩაკვეტაძის ზუსტი ძლიერი დარტყმა მეკარე ანატოლი ტრიუბინმა მოიგერია.

მთლიანობაში, საქართველოს ნაკრებმა მეტოქის კართან უფრო მეტი საფრთხე შექმნა, თუმცა გოლის გატანა ვერ შეძლო.

მეორე ტაიმში თამაშის სურათი დიდად არ შეცვლილა – საქართველოს ნაკრები მეტოქის კარის აღებას ცდილობდა, თუმცა უკრაინის დაცვა და განსაკუთრებით ტრიუბინი საიმედოდ მოქმედებდნენ.

რამაზ სვანაძემ შეხვედრის მეორე ნახევარში შეტევის გასაძლიერებლად ცვლილებებს მიმართა. მოედანი დატოვეს ჟორჟ მიქაუტაძემ, გიორგი ჩაკვეტაძემ და ოთარ კიტეიშვილმა, მათ ნაცვლად კი თამაშში გიორგი კვერნაძე, ზურიკო დავითაშვილი და ანზორ მექვაბიშვილი ჩაერთნენ.

თუმცა ცვლილებებმა შედეგი ვერ მოიტანა და საბოლოოდ ტაბლოზე 0:0 დაფიქსირდა.

12 მატჩი უკრაინასთან – საქართველო კვლავ ვერ იმარჯვებს

საქართველოს ნაკრებმა უკრაინის წინააღმდეგ ნავსი ვერც ამჯერად გატეხა და მეტოქე კვლავ ვერ დაამარცხა.

დღევანდელის ჩათვლით გუნდები 12-ჯერ შეხვდნენ ერთმანეთს, აქედან საქართველომ 7 მატჩი წააგო, 5 კი ფრედ დაასრულა. ანუ 12 შეხვედრიდან საქართველოს ნაკრებს არცერთი არ მოუგია.

ამ გუნდების წინა შეხვედრაც ფრედ დასრულდა – 2024 წლის ნოემბერში თბილისში საქართველოსა და უკრაინის ნაკრებებმა 1:1 ითამაშეს. მანამდე, იმავე ერთა ლიგის გათამაშებაში, უკრაინამ პოლონეთში საქართველოს 1:0 მოუგო.

დღევანდელი ფრის შემდეგ საქართველოს ნაკრებმა პირველი ქულა მოიპოვა და ჯგუფში მე-3 ადგილს იკავებს. პირველ ტურში „ჯვაროსნები“ ჩრდილოეთ ირლანდიასთან 0:1 დამარცხდნენ.

B ჯგუფში უკრაინა ლიდერობს, რომელსაც 2 მატჩის შემდეგ 4 ქულა აქვს. უკრაინელებმა 3 ქულა უნგრეთთან გამარჯვებით მოიპოვეს პირველ ტურში. ბოლო ადგილზე უნგრეთია 0 ქულით, თუმცა მას მხოლოდ ერთი მატჩი აქვს ჩატარებული.

უეფას ოფიციალური კალენდრის მიხედვით, საქართველო 2 ოქტომბერს გასვლით შეხვედრას უნგრეთთან გამართავს.

ნუცა ყაველაშვილი