ესპანეთის ტრანსპორტის მინისტრმა გადადგომა გადაწყვიტა სარკინიგზო კატასტროფიდან ერთ კვირაში

• 28 ოქტომბერს მომხდარი ტრაგედიის გამო გამართული საპროტესტო აქციების მონაწილეები და ოპოზიციური პარტიები ტრანსპორტის მინისტრის გადადგომას მოითხოვდნენ, თუმცა ჯერ კიდევ 30 ოქტომბერს პუენტე აცხადებდა, რომ თანამდებობის დატოვებას არ აპირებს.

გადადგომის გადაწყვეტილება მინისტრმა 3 ნოემბერს საღამოს გამოაცხადა ესპანეთის პარლამენტში, რომელსაც ანგარიში წარუდგინა მატარებლების შეჯახების გარემოებათა შესახებ.

ოსკარ პუენტეს განცხადებით, ერთი წლის განმავლობაში ორი მასშტაბური კატასტროფის შემდეგ მინისტრი თანამდებობაზე ვერ დარჩება და ეს პოლიტიკური ღირსებისა და პასუხისმგებლობის საკითხია.

• ორიდან პირველი კატასტროფა, რომელზეც პუენტემ მიუთითა, ესპანეთის სამხრეთში მოხდა 2026 წლის 18 იანვარს. ორი სამგზავრო მატარებლის შეჯახების შედეგად 46 ადამიანი დაიღუპა.

წლის განმავლობაში მეორე მასშტაბური კატასტროფა

28 ოქტომბერს ესპანეთის სახელმწიფო სარკინიგზო კომპანია Renfe-ს ჩქაროსნული მატარებელი შეეჯახა ამავე ხაზზე გაჩერებულ, კერძო კომპანია Iryo-ს მატარებელს. რამდენიმე ვაგონი რელსებიდან გადავარდა. ორივე მატარებელში 500-ზე მეტი მგზავრი იმყოფებოდა.

დაიღუპა 69 ადამიანი და ათეულობით დაშავდა.

ორივე მატარებელი დედაქალაქ მადრიდიდან მიემართებოდა ანდალუსიის რეგიონის ქალაქ სევილიისკენ.

28 ოქტომბერს ესპანეთის ტრანსპორტის მინისტრმა ოსკარ პუენტემ ჟურნალისტებს განუცხადა, რომ დილით კომპიუტერულ სისტემაში იყო შეფერხება, რამაც გამოიწვია უკვე გზაში მყოფი ამ ორი და კიდევ რამდენიმე მატარებლის გაჩერება. მართვა გადაეცა დისპეტჩერების ცენტრს, რომელმაც მატარებლებს შეცდომით მისცა მოძრაობის განახლების უფლება სიჩქარის შეზღუდვის გარეშე.

ამას ადასტურებს მემანქანეებსა და დისპეტჩერებს შორის საუბრის ჩანაწერი, რომელიც ესპანურმა მედიამ კატასტროფიდან მეორე დღეს გაავრცელა.