netgazeti 
ამერიკის პრეზიდენტმა, დონალდ ტრამპმა და უკრაინის პრეზიდენტმა, ვოლოდიმირ ზელენსკიმ ნიუ-იორკში გაეროს გენერალური ასამბლეის ფარგლებში შეხვედრის დაწყებამდე მედიასთან ისაუბრეს.
ტრამპმა კიდევ ერთხელ გაიმეორა, ჩვეული ფრაზა, რომ ფიქრობს რუსეთი და უკრაინა შეთანხმებას მიაღწევენ, მაგრამ კვლავ არ დაუკონკრეტებია შესაძლო შეთანხმების დეტალები.
„ნუ, ვფიქრობ, ისინი შეთანხმებას მიაღწევენ და არ მინდა ვთქვა, რაში მდგომარეობს ეს შეთანხმება. ჩვენ ამაზე ბევრს ვსაუბრობთ, მათ შორის პრეზიდენტ პუტინთანაც, და ვფიქრობ, რაღაც მოხდება“, – თქვა ტრამპმა.
მან აღნიშნა, რომ უკრაინელები ძალიან კარგი მებრძოლები და უნარიანი ხალხი არიან.
ზელენსკიმ განაცხადა, რომ იმედოვნებს, პრეზიდენტი ტრამპი „დაგვეხმარება ამ ომის დასრულებაში. და ვფიქრობ, ეს რაც შეიძლება სწრაფად, ზამთრამდე უნდა გავაკეთოთ, უკეთესია ზამთრამდე“.
სპეციალურმა წარმომადგენლებმა, სტივ ვიტკოფმა და ჯარედ კუშნერმა, მიმდინარე კონფლიქტის განსახილველად ახლახან იმოგზაურეს როგორც კიევში, ისე მოსკოვში. იმ დროისთვის თეთრმა სახლმა განაცხადა, რომ ეს მოლაპარაკებები იყო „არსებითი“ და მომდევნო ნაბიჯები უახლოეს კვირებში განიხილებოდა.
ზელენსკიმ ჟურნალისტის კითხვაზე პასუხად აღნიშნა, რომ „ყველაზე მნიშვნელოვანი რამ“, რაც აშშ-ის პრეზიდენტს შეუძლია გააკეთოს, სამმხრივი შეხვედრის ორგანიზებაა, სადაც განხილული იქნება „ყველა სენსიტიური საკითხი, რაც ლიდერებს ომის დასასრულებლად შეუძლიათ წამოჭრან“.
შეკითხვაზე, იყო თუ არა მზად ვლადიმირ პუტინთან შეხვედრისთვის, ზელენსკიმ პირდაპირ უპასუხა: „მზად ვარ“.
„ნებისმიერ დროს, როდესაც ყველა მხარე მზად იქნება… ჩვენ ყველამ რაც შეიძლება სწრაფად უნდა ვიმოქმედოთ“, – ამბობს ის.
