radiotavisupleba ახალი ამბები 
უკრაინის პარლამენტი 15 სექტემბერს კენჭს უყრის ქვეყნის გენერალური პროკურორის რუსლან კრავჩენკოს გათავისუფლების საკითხს. 14 სექტემბერს უკრაინის პრეზიდენტმა ვოლოდიმირ ზელენსკიმ ვერხოვნა რადას მოუწოდა დროულად მიიღოს გადაწყვეტილება კრავჩენკოს გათავისუფლებაზე.
მოქმედმა გენერალურმა პროკურორმა გადადგომის შესახებ განცხადება გასულ კვირაში დაწერა და განაცხადა, რომ არ სურს მისი თანამდებობა გამოყენებული იყოს „პოლიტიკური დაპირისპირების ინსტრუმენტად“, მას შემდეგ, რაც ანტიკორუფციული უწყების გამომძიებლებმა გამოავლინეს დატაცების სქემა, რომლის კვალიც პროკურატურის მაღალჩინოსანთან მიდის.
14 სექტემბერს, რუსლან კრავჩენკომ განაცხადა, რომ მან ხელი მოაწერა დოკუმენტს ეროვნული ანტიკორუფციული ბიუროს ხელმძღვანელის ეჭვმიტანილად გამოცხადებაზე. ეროვნული ანტიკორუფციული ბიურო კრავჩუკის ამ ნაბიჯს გამოეხმაურა განცხადებით და ის შეაფასა „დამოუკიდებელ ანტიკორუფციულ უწყებებზე სისტემური თავდასხმის გაგრძელებად“.
უკრაინის პრეზიდენტ ვოლოდიმირ ზელენსკის განცხადებით, „გენერალური პროკურორისთვის მხოლოდ ერთი გზა არსებობს: მისი თანამდებობიდან გათავისუფლება. ესაა, რაც მე მას ვუთხარი. უკრაინამ იხილა ყველა მიზეზი ამისთვის.
თუკი ის ამას ჩათვლის პოლიტიკურ ზეწოლად, დაე, ასე უწოდოს. ვთხოვ პარლამენტარებს დაუყოვნებლივ დაუჭირონ მხარი მის გათავისუფლებას“.
რუსლან კრავჩენკომ განაცხადა, რომ ის ახლა ქვეყნის გარეთ იმყოფება საქმიანი ვიზიტით. მის გარშემო წინააღმდეგობები არის კორუფციული ბრალდებებისა და გამოძიებების ამბის გაგრძელება, რაც ჩრდილს აყენებს ზელენსკის ხელისუფლებას.
გასულ წელს თანამდებობიდან წასვლა მოუხდა ზელენკის ოფისის ხელმძღვანელს ანდრი იერმაკს, როცა გამომძიებლები იძიებდნენ სქემას, რომელიც სახელმწიფო კომპანია „ენერგოატომის“ კონტრაქტორებისგან მილიონობით დოლარის ქრთამის სახით დაბრუნებას უკავშირდებოდა.
მიხაილო ფედოროვი, რომელიც 2026 წლის ივლისამდე უკრაინის თავდაცვის მინისტრის თანამდებობას იკავებდა, საჯაროდ აცხადებდა კორუფციაზე თავდაცვის სექტორში, რაც ბევრმა ანალიტიკოსმა ვოლოდიმირ ზელენსკის მიმართ ღია გამოწვევად შეაფასა.
მოგვიანებით თანამდებობიდან გადააყენეს გენერალი ოლექსანდრ სირსკი, რომელთანაც დაპირისპირება ჰქონდა ფედოროვს.
თავად პრეზიდენტი ზელენსკი სკანდალებში არ გახვეულა. ამ პროცესებმა იუსტიციისა და ენერგეტიკის მინისტრების გადაყენება გამოიწვია.
ივლისში ვოლოდიმირ ზელენსკიმ სერიოზული ცვლილებები განახორციელა მთავრობის შემადგენლობაში - გაათავისუფლა პრემიერმინისტრი იულია სვირიდენკო და ის სახელმწიფო ენერგოკომპანია „ნაფტოგაზის“ ხელმძღვანელ სერჰიი კორეცკითი შეცვალა. უკრაინის პრეზიდენტმა აშშ-ში უკრაინის ელჩობიდან გაათავისუფლა ოლჰა სტეპანიშინა, რომელსაც ასევე შეეხო კორუფციული ბრალდებები.
კორუფციულმა სკანდალებმა სერიოზულად დააზიანეს ვოლოდიმირ ზელენსკის პოპულარულობის ხარისხი - საზოგადოებრივი აზრის არაერთმა გამოკითხვამ აჩვენა, რომ მას პოპულარულობით რამდენიმე ცნობილი საჯარო ფიგურა უსწრებს. მათ შორის ყველაზე მეტად გამორჩეულია ვალერი ზალუჟნი, უკრაინის შეიარაღებული ძალების ყოფილი მთავარსარდალი, რომელიც ახლა უკრაინის ელჩია გაერთიანებულ სამეფოში.
