ზელენსკი: ფიცო ირჩევს მოსკოვს

1 day ago 2

უკრაინის პრეზიდენტმა ვოლოდიმირ ზელენსკიმ უპასუხა სლოვაკეთის პრემიერ-მინისტრ რობერტ ფიცოს, რომელმაც მას „მტერი“ უწოდა.

29 იანვარს, შუაღამის შემდეგ ზელენსკიმ სოციალური ქსელებით გაავრცელა განცხადება, რომ მაშინ, როცა ევროპის ბევრმა ქვეყანამ სუვერენიტეტის შენარჩუნების სასარგებლოდ რუსულ გაზზე უარი თქვა, ფიცომ სხვა გზა აირჩია.

უკრაინის პრეზიდენტის განცხადებით, რამდენიმე დღის წინ პრეზიდენტმა ტრამპმა მიიღო „ძლიერი გადაწყვეტილება“, რომელიც შესაძლებელს გახდის ევროპაში ამერიკული თხევადი ბუნებრივი აირის ექსპორტის მნიშვნელოვნად გაზრდას. ზელენსკის თანახმად, სწორედ ეს, ევროპისთვის პარტნიორებისგან მეტი ენერგორესურსია საჭირო უსაფრთხოებისა და სტაბილურობისთვის, რადგან ამერიკული თხევადი აირისთვის ფულის გადახდაა საჭირო, ხოლო რუსული გაზის საფასური ფულის გარდა დამოუკიდებლობა და სუვერენიტეტია.

ზელენსკის განცხადებით, ევროპაში ბევრმა აირჩია დამოუკიდებლობის და სუვერენიტეტის შენარჩუნება, „მაგრამ არა ბატონმა ფიცომ“, რომელიც „ირჩევს მოსკოვს, ნაცვლად ამერიკის და სხვა პარტნიორებისა, რომლებსაც შეუძლიათ მისი ქვეყანა გაზით უზრუნველყონ კომერციული პირობებით“. ზელენსკიმ ფიცოს არჩევანს შეცდომა უწოდა.

უკრაინის ხელისუფლების გადაწყვეტილებით, 2025 წლის 1 იანვრიდან შეწყდა ქვეყნის ტერიტორიის გავლით ევროპაში რუსული ბუნებრივი გაზის ტრანზიტი.

სლოვაკეთი ტრანზიტის აღდგენას მოითხოვს. 28 იანვარს პრემიერ-მინისტრმა რობერტ ფიცომ პრეზიდენტ ვოლოდიმირ ზელენსკის მტერი უწოდა და კიდევ ერთხელ დაიმუქრა, რომ დაბლოკავს ევროკავშირის მიერ უკრაინის დახმარებას.

ევროკავშირისა და ნატოს წევრი სლოვაკეთის პრემიერ-მინისტრ რობერტ ფიცოს კარგი ურთიერთობა აქვს რუსეთის პრეზიდენტ ვლადიმირ პუტინთან. ფიცო უნგრელ კოლეგა ვიქტორ ორბანთან ერთად აკრიტიკებს ევროკავშირის პოლიტიკას რუსეთისადმი და უკრაინის მხარდაჭერას.

სლოვაკეთში ფიცოს პოლიტიკის წინააღმდეგ ხალხმრავალი საპროტესტო გამოსვლებია. ოპოზიცია პრემიერ-მინისტრს ადანაშაულებს სლოვაკეთის იზოლაციის გამომწვევ ანტიდასავლურ საგარეო-პოლიტიკურ კურსსა და რუსეთის პრეზიდენტ პუტინთან თანამშრომლობაში და აცხადებს, რომ არ დაუშვებს აღმოსავლეთისკენ ქვეყნის შეტრიალებას.

სრულად წაკითხვა