"თავდადება და მებრძოლი სული იმედს მაძლევს" - ჭიაბრიშვილი გამარჯვების შემდეგ

ბათუმის "დინამოს" მთავარმა მწვრთნელმა, გიორგი ჭიაბრიშვილმა, "დინამო თბილისთან" გამოტოვებული პირველი ტურის მატჩის შესახებ ისაუბრა. შეხვედრა მისმა გუნდმა ცხრა ფეხბურთელით 1:0 მოიგო.

ჭიაბრიშვილმა აღნიშნა, რომ მისმა მოთამაშეებმა უდიდესი თავდადება და მებრძოლი სული აჩვენეს, რაც მას იმედს აძლევს. მიუხედავად იმისა, რომ თამაშის ხარისხზე საუბრისგან თავი შეიკავა, გუნდური სულისკვეთებით კმაყოფილი დარჩა.

მან ასევე გამორჩეულად შეაქო ბათუმის „დინამოს“ გულშემატკივრები, რომელთა მხარდაჭერამ გუნდი ბოლომდე ბრძოლისკენ შთააგონა.

რაც შეეხება მატჩის ბოლოს ცხრა კაცით დარჩენას, ჭიაბრიშვილმა აღნიშნა, რომ მის გუნდში ნამდვილი ვაჟკაცები თამაშობენ და სწორედ ასე ყალიბდება ძლიერი კოლექტივი. მისი თქმით, თამაშებამდე თავადაც არ იცოდა, თუ რამდენად ძლიერი ხასიათი ჰქონდა მის ფეხბურთელებს, რაც მისთვის სასიამოვნო აღმოჩენა იყო.

ბათუმის "დინამომ" ბოლო ორ ტურში ძლიერი მეტოქეები დაამარცხა – ქუთაისის "ტორპედო" (2:1) და "დინამო თბილისი" (1:0). შედეგად, ხუთი ტურის შემდეგ გუნდს 11 ქულა დაუგროვდა და გათამაშების ლიდერ „იბერიას“ გაუთანაბრდა.