radiotavisupleba ახალი ამბები 
ისრაელის სამხედროებმა ორშაბათს განაცხადეს, რომ დააკავეს ორი პირი, რომლებიც, მათი თქმით, უახლოვდებოდნენ არმიის საგუშაგოს სამხრეთ სირიის იმ ტერიტორიაზე, რომელიც ისრაელს აქვს ოკუპირებული პრეზიდენტ ბაშარ ასადის დამხობის შემდეგ.
„ცოტა ხნის წინ ისრაელის თავდაცვის ძალების ჯარისკაცებმა სამხრეთ სირიის უსაფრთხოების ზონაში ისრაელის თავდაცვის ძალების საგუშაგოსკენ მოტოციკლით მოძრავი ორი ეჭვმიტანილი შეამჩნიეს. იდენტიფიცირების შემდეგ ჯარისკაცებმა ეჭვმიტანილის დაკავების პროცედურა დაიწყეს და ორივე ეჭვმიტანილი დააკავეს,“ – ნათქვამია არმიის განცხადებაში.
მის თანახმად, „ისრაელის თავდაცვის ძალების მხრიდან დაშავებულების შესახებ ინფორმაცია არ გავრცელებულა.“.
ეს ინციდენტი მოხდა რამდენიმე საათში მას შემდეგ, რაც ისრაელის სამხედროებმა ორშაბათს ღამით მოკლეს თავდამსხმელი პირი სამხრეთ სირიის ე.წ. „უსაფრთხოების ზონაში“ მდებარე არმიის საგუშაგოსთან.
მას შემდეგ, რაც 2024 წლის ბოლოს, დამასკში, ხელისუფლებაში ადრე ტერორისტად შერაცხილი აჰმედ ალ-შარაა, მოვიდა, როდესაც მისმა ამბოხებულთა კოალიციამ ასადი დაამხო, ისრაელმა სირიის წინააღმდეგ ასობით დარტყმა განახორციელა.
ისრაელის თავდაცვის ძალები რამდენჯერმე შეიჭრნენ ქვეყნის სამხრეთში და ჯარები განათავსეს გაეროს ზედამხედველობის ქვეშ მყოფ ბუფერულ ზონაში, რომელიც ისრაელისა და სირიის ძალებს ყოფს გოლანის მაღლობებზე, სირიის ტერიტორიაზე, რომელიც ისრაელმა დაიკავა 1967 წელს თავის მიწად გამოაცხადა. გაერო ამ ტერიტორიას ისრაელის კუთვნილებად არ აღიარებს.
ისრაელის ოფიციალურმა პირებმა არაერთხელ განაცხადეს თავიანთი განზრახვის შესახებ, შეინარჩუნონ ჯარები „უსაფრთხოების ზონაში“, ხოლო ისრაელის ლიდერებმა განაცხადეს, რომ სურთ, სამხრეთ სირიის ვრცელი ტერიტორიები დემილიტარიზებულ ზონად იქცეს.
