ისრაელმა იორდანეს დასავლეთ სანაპიროზე, პალესტინელების ქალაქში, დასახლებების მშენებლობის გეგმა დაამტკიცა

17 ივნისს ისრაელმა დაამტკიცა ებრაული სკოლის გაფართოების გეგმა ოკუპირებულ დასავლეთ სანაპიროზე, პალესტინის ქალაქ ჰებრონის ცენტრში მცხოვრები მოსახლეებისთვის, რაც, პალესტინელების თქმით, ათწლეულების წინ მიღწეულ შეთანხმებას არღვევს.

ისრაელის ფინანსთა მინისტრმა ამ გეგმების შესახებ გამოაცხადა ერთ დღეში მას მერე, რაც განაცხადა, რომ გააუქმა შეთანხმება, რომლის მიხედვით, გარკვეულ დაგეგმარებასა და სამშენებლო სამუშაოებს ჰებრონის ისტორიული ცენტრის გარშემო, სადაც წმინდა სალოცავი მდებარეობს, პალესტინელთა მუნიციპალიტეტი აკონტროლებდა.

“პატრიარქების მღვიმის გარშემო” მდებარე ანკლავზე - რომელსაც თაყვანს სცემენ მუსლიმები, ებრაელები და ქრისტიანები - ბინადრობს 1000-ზე მეტი ებრაელი მოსახლე, რომლებიც ათიათასობით პალესტინელთან ერთად ცხოვრობენ ისრაელის უსაფრთხოების სრული კონტროლის ქვეშ.

1997 წლის ჰებრონის შეთანხმების თანახმად, ისრაელის ჯარები კვლავ განლაგებულია ამ ტერიტორიაზე, თუმცა მშენებლობას, მათ შორის სალოცავის გარშემო, ზოგადად პალესტინის მუნიციპალიტეტის თანხმობა სჭირდებოდა.

ქალაქის რელიგიური მემკვიდრეობა მას ცენტრალურ ადგილად აქცევს ისრაელელი მოსახლეებისთვის, რომლებსაც მტკიცედ აქვთ გადაწყვეტილი, გააფართოონ იქ ებრაელების ყოფნა.

ისრაელის ულტრამემარჯვენე ფინანსთა მინისტრმა, ბეზალალ სმოტრიჩმა, განაცხადა, რომ ჰებრონის ისტორიულ ცენტრში ებრაული სკოლისთვის 1000 კვადრატული მეტრის ფართობის შენობის მშენებლობა გადაწყდა.

„ჩვენ პრაქტიკაში ვაგრძელებთ ისრაელის მიწის მშენებლობას და დასახლებებში პრაქტიკული სუვერენიტეტის განხორციელებას“, - განაცხადა სმოტრიჩმა, რომელმაც თქვა, რომ პალესტინის სახელმწიფოებრიობის იდეის დამარხვა სურს.

პალესტინელთა ტერიტორია, იორდანეს დასავლეთი ნაპირი ღაზის სექტორთან ერთად, ისრაელმა ე.წ. ექვსდღიანი ომის დროს დაიკავა და მას მერე მისი კონტროლის ქვეშაა. 2024 წელს მართლმსაჯულების საერთაშორისო სასამართლომ ისრაელის მიერ ოკუპირებულ ტერიტორიებზე ისრაელელების დასახლელების მშენებლობა საერთაშორისო სამართლის დარღვევად შეაფასა. სასამართლოს თანახმად, ის ჟენევის კონვენციის საწინააღმდეგო ქმედებაა.