radiotavisupleba ახალი ამბები 
რუსეთის ცენტრალური საარჩევნო კომისიის ოფიციალური მონაცემებით, რამზან კადიროვმა ხმების 99,85%-ით გაიმარჯვა ჩეჩნეთის რესპუბლიკის მეთაურის არჩევნებში, რომელიც რუსეთის სახელმწიფო დუმის არჩევნებთან ერთად ჩატარდა.
არჩევნების დასრულებიდან მეორე დღეს, 21 სექტემბერს გამოქვეყნებული ოფიციალური მონაცემებით, პარტია „ერთიანი რუსეთის“ კანდიდატის, რამზან კადიროვის კონკურენტებმა, „სამართლიანი რუსეთის“ და კომუნისტური პარტიის კანდიდატებმა, ისმაილ დენილხანოვმა და ხალიდ ნაკაევმა 0,05-0,05% მიიღეს. არცერთ მათგანს საარჩევნო კამპანია ფაქტობრივად, არ ჰქონია.
რაც შეეხება კადიროვს, რეპრესიებითა და სისასტიკით ცნობილ მმართველს, ის საარჩევნო კამპანიის დროს მოითხოვდა განსხვავებულად მოაზროვნეთა წინააღმდეგ ბრძოლის გაძლიერებას.
- 2026 წლის არჩევნების ოფიციალური შედეგით, ხმების 99,85%-ით, კადიროვმა გაიუმჯობესა 2021 წლის არჩევნებისას დამყარებული რეკორდი, როცა ოფიციალური მონაცემებით, ჩეჩნეთის მეთაურად არჩეულად გამოცხადდა ხმების 99,7%-ით.
სახელმწიფო დუმის არჩევნების(18-20 სექტემბერი) გარდა, რუსეთში ჩატარდა 8 რეგიონის ხელმძღვანელების პირდაპირი არჩევნები.
რუსეთის ცენტრალური საარჩევნო კომისიის მიერ 21 სექტემბერს გამოქვეყნებული წინასწარი შედეგებით, კადიროვის გარდა პარტია „ერთიანი რუსეთის“ კანდიდატებმა გაიმარჯვეს მორდოვეთის და ტუვის რესპუბლიკების მეთაურების და ბელგოროდის, ბრიანსკის, პენზის და ტვერის ოლქების გუბერნატორთა არჩევნებში. კომუნისტური პარტიის კანდიდატმა გაიმარჯვა ულიანოვსკის ოლქის გუბერნატორის არჩევნებში.
რუსეთში არჩევნები ჩატარდა უკრაინის წინააღმდეგ ომის, რუსეთის ხელისუფლების მიერ პოლიტიკურ სისტემაზე კონტროლისა და რეპრესიების გაძლიერების, ოპონენტების კიდევ უფრო შეზღუდვისა და ქვეყანაში რეალური პოლიტიკური კონკურენციის არარსებობის პირობებში.
