კატალონიის გამოყოფის მომხრე პუჩდემონს ნება დართეს დაბრუნდეს ესპანეთში

ესპანეთის უზენაესმა სასამართლომ 19 ოქტომბერს გააუქმა დაპატიმრების ორდერი, რომელიც გაცემული იყო კატალონიის მხარის ყოფილ პრემიერ-მინისტრზე, კარლეს პუჩდემონზე - იგი გამოდიოდა კატალონიის ესპანეთისგან გამოყოფისთვის. პუჩდემონი ცხრა წლის განმავლობაში საზღვარგარეთ ცხოვრობდა და ახლა უკვე შეძლებს სამშობლოში დაბრუნებას.

პუჩდემონის დაპატიმრების ორდერი ესპანეთის ხელისუფლებამ გასცა 2017 წელს - მას მერე, რაც მან რეფერენდუმი ჩაატარა კატალონიის მიერ დამოუკიდებლობის გამოცხადებაზე. დამოუკიდებლობას მხარი დაუჭირა მონაწილეთა 90-ზე მეტმა პროცენტმა. მაგრამ მადრიდმა რეფერენდუმი უკანონოდ გამოაცხადა, ხოლო პუჩდემონს და კატალონიის სხვა პოლიტიკოსებს ამბოხებაში დასდეს ბრალი.

პუჩდემონმა ესპანეთი დატოვა და ცხრა წელიწადზე მეტი დროის განმავლობაში ევროპის სხვა სახელმწიფოებში, ძირითადად ბელგიაში ცხოვრობდა. 2024 წელს მან ერთხელ მოახერხა ესპანეთში ჩასვლა და მრავალრიცხოვანი აუდიტორიის წინაშე გამოსვლა. პოლიციამ ვერ დაადგინა როგორ შევიდა იგი ესპანეთში და შემდეგ როგორ დატოვა ქვეყანა.

ამავე 2024 წელს, ესპანეთში ხელისუფლების შეცვლის შემდეგ, ამნისტია გამოცხადდა ბევრი პოლიტიკოსისთვის და აქტივისტისთვის, რომლებიც კატალონიის გამოყოფისთვის გამოდიოდნენ. ის არ შეეხო პუჩდემონს და მისი ხელისუფლების ორ მინისტრს. უზენაესი სასამართლოს მიერ 19 ოქტომბერს მიღებული გადაწყვეტილება სამივეს ათავისუფლებს სამართლებრივი დევნისგან.

პუჩდემონს ბევრჯერ აქვს ნათქვამი, რომ ესპანეთში დაბრუნდებოდა იმ შემთხვევაში, თუკი შეწყდებოდა მისი სამართლებრივი დევნა. იგი არ გამორიცხავდა კატალონიის პოლიტიკაში დაბრუნებას.