„კაცი გარდაიცვალა ნერვიულობით!!! ვინც ნერვიულობთ დეპორტაციაზე, გთხოვთ, ნუ უჯერებთ გავრცელებულ ჭორებს!.. “ – ნინი შერმადინი

20 იანვარს, ინაუგურაციის შემდეგ მალევე დონალდ ტრამპმა ხელი მოაწერა აღმასრულებელ აქტს საიმიგრაციო პოლიტიკის გამკაცრების თაობაზე.

ტრამპის ახალი ადმინისტრაციის ხისტი საიმიგრაციო პოლიტიკის პირობებში ემიგრანტებს შორის შიში და გაურკვევლობა გაჩნდა. ჯერჯერობით არავინ არაფერი იცის და მოვლენების განვითარებას დაძაბულად აკვირდებიან.

ემიგრანტები სოციალურ ქსელებში, დახურულ თუ ღია ჯგუფებში ერთმანეთს თავიანთ საემიგრაციო გამოცდილებას უზიარებენ.

ამერიკაში მცხოვრებმა ქართველმა მომღერალმა ნინი შერმადინმა ამ საკითხზე სტატუსი გამოაქვეყნა:

„მეგობრებო, ძალიან ბევრი ანონიმური პოსტი მხვდება და არ შემეძლო არ დამეწერა ეს პოსტი.

ქართველებო, ვინც ნერვიულობთ დეპორტაციაზე, გთხოვთ ნუ უჯერებთ გავრცელებულ ჭორებს, რომ თითქოს ხალხს ქუჩაში დასდევენ და ადეპორტებენ. დიახ არის რეიდები, მაგრამ ვისაც კრიმინალი აქვს ჩადენილი, იმ ადამიანებს ეხებათ და არა პატიოსან მშრომელ ხალხს. ამას წინათ სადღაც წავიკითხე, ვითომ X Factory-დან ხალხი აიყვანეს, ზუსტად იმ დღეს იქ ვმღეროდი ღამის 1 საათამდე, იქ ვიყავით მე და ირაკლი შარაძე. პოლიცია უბრალოდ პერიმეტრს აკონტროლებდა, როგორც ეს სულ ხდება. არავინ არ აუყვანიათ და არც გაუდეპორტებიათ, გუშინ ჩემი მეგობარი გააჩერეს, ისიც მექსიკიდან შემოსული და უპრობლემოდ გაუშვეს!

ჩემი მეგობრის დეიდაშვილის შვილს, ახალგაზრდა ბიჭს, გული გაუსკდა ნერვიულობისგან, არ იმუშაო, გაგადეპორტებენო და ვერ გადაიტანა ადამიანმა, ამდენ ვალს როგორ გადავიხდიო და გარდაიცვალა! კაცი გარდაიცვალა ნერვიულობით!!!! ყველას გული ერთნაირად ვერ უძლებს! ამდენი ანონიმური მესიჯი ჯგუფებში, ასე ხალხის დაზაფვრა, თქვენ რა სიამოვნებას განიჭებთ? რას ემსახურებით? რამ გაგაბოროტათ ასე ხალხო?!

მეგობრებო, გთხოვთ ნუ უსმენთ ნურავის, გააგრძელეთ მუშაობა პატიოსნად, იცხოვრეთ მშვიდად, ჩვეულ რიტმში! მშვიდობიან და მშრომელ ხალხს არავინ არსად გააგდებს! მიყვარხართ  და წარმატებები ყველას“, – წერს ნინი შერმადინი