კიევი აცხადებს, რომ ჩრდილოეთ კორეის დატყვევებული სამხედროები მას სარგებლიან ინფორმაციას აწვდიან

უკრაინის სამხედრო დაზვერვის (HUR) განცხადებით, ჩრდილოეთ კორეის ორ ჯარისკაცს, რომლებიც რუსეთის მხარეს ბრძოლისას დაატყვევეს, კვლავ დაკითხვას უტარებენ და კიევი მზადაა ისინი გაცვალოს მოსკოვის მიერ დატყვევებულ უკრაინელ სამხედროებზე - თუკი ამგვარი გაცვლის ორგანიზატორი იქნება ჩრდილოეთ კორეის ლიდერი, კიმ ჩენ ინი.

13 იანვარს, რადიო თავისუფლების უკრაინულ სამსახურთან ინტერვიუში HUR-ის წარმომადგენელმა, იევჰენ იერინმა თქვა, რომ ჩრდილოეთ კორეის სამხედროთა დატყვევება კიევს "ბევრ სარგებლიან შესაძლებლობას" უჩენს. ეს პირველი შემთხვევაა, როცა კიევი ჩრდილოეთ კორეელ ტყვეებზე აცხადებს მას მერე, რაც ფხენიანის ძალები რუსეთის მხარეს ბრძოლაში ჩაერთვნენ.

"ინფორმაცია, რომელსაც ამ ინდივიდებისგან მოვიპოვებთ, მნიშვნელოვანია არა მხოლოდ ოპერატიული დაზვერვისთვის, არამედ როგორც პოლიტიკური იარაღი, რუსეთის სამხედრო ქმედებებში ჩრდილოეთ კორეის არმიის მონაწილეობის გამოსავლენად" - ამბობს იერინი.

ორი დაჭრილი ჯარისკაცის დატყვევების ამბავი 11 იანვარს გამოაცხადა უკრაინის პრეზიდენტმა, ვოლოდიმირ ზელენსკიმ. ეს ცნობა ჯერჯერობით არც მოსკოვს და არც ფხენიანს არ დაუდასტურებიათ.