კობახიძე აქციის დარბევაზე: ჩვენი ამოცანა იყო, ცალკეული ადამიანების ჯანმრთელობაზე მძიმე კვალი აგვეცილებინა

პრემიერ-მინისტრი, ირაკლი კობახიძე აცხადებს, რომ საპროტესტო აქციების დარბევის დროს ხელისუფლების ამოცანა იყო, თავიდან აეცილებინა ცალკეული ადამიანების ჯანმრთელობაზე მძიმე კვალი და მსხვერპლი. ამის შესახებ მან ტელეკომპანია "იმედის" ეთერში ისაუბრა.

"ეს ამოცანა შესრულებულია", - ირწმუნება კობახიძე და მადლობას უხდის პოლიციას.

"ჩვენი მთავარი ამოცანა იყო, მძიმე განვითარება არ მოჰყოლოდა ამ ყველაფერს და პირველ რიგში, ეს იყო მსხვერპლის თავიდან აცილება... ეს არის შსს-ს დამსახურება, თითოეული პოლციიელის ხელმძღვანელობის დამსახურება...

მეორე იყო, თუნდაც, ისეთი შედეგის თავიდან აცილება, რაც ცალკეული ადამიანის ჯანმრთელობას დაატყობდა კვალს.

გახსოვთ, როგორ დასრულდა საქართველოში 2011 წლის შეკრების დარბევა - 4 კაცი მოკლეს მშვიდობიან შეკრებაზე. ასევე, მინდა შეგახსენოთ ["ქართული ოცნების" ხელისუფლების ყოფილი პრემიერის] გიორგი გახარიას "გმირობა" 2019 წელს, როდესაც 7 ადამიანს დარჩა მძიმე კვალი ჯანმრთელობაზე, მათ შორის ორმა დაკარგა თვალი", - თქვა კობახიძემ და აღნიშნა, რომ აქციის დარბევის დროს "იყო ცალკეული გადაცდომები, მათ შორის, მძიმე ინციდენტები", რაც "ძალიან უსიამოვნო იყო".

"ამაზე გამოძიება მიმდინარეობს და, რა თქმა უნდა, ბოლომდე უნდა მივიდეს".