ლავროვი 2022 წლის თებერვლის შემდეგ პირველად ჩავიდა ევროკავშირის ქვეყანაში

ეუთოს ყოველწლიურ მინისტერიალზე რუსეთი, რომელსაც საგარეო საქმეთა მინისტრი სერგეი ლავროვი წარმოადგენს, დასავლეთის ქვეყნების, მათ შორის შეერთებული შტატების, მწვავე კრიტიკის საგანი გახდა უკრაინაში მიმდინარე ომის გამო. შეხვედრა წელს მალტაში იმართება 5-6 დეკემბერს.

„ჩემი გზავნილი რუსეთის დელეგაციისთვის არის ის, რომ ჩვენ არ წამოვეგებით თქვენს ტყუილს. ჩვენ ვიცით, რასაც აკეთებთ. თქვენ ცდილობთ, აღადგინოთ რუსეთის იმპერია და ჩვენ ამის საშუალებას არ მოგცემთ“, - განაცხადა პოლონეთის საგარეო საქმეთა მინისტრმა რადოსლავ სიკორსკიმ თავის გამოსვლაში.

უკრაინის საგარეო საქმეთა მინისტრმა ანდრი სიბიჰამ შეხვედრაზე განაცხადა, რომ მისი ქვეყანა აგრძელებს ბრძოლას არსებობის უფლებისთვის და სამართლიანობა იმარჯვებს. ამასთან, სიბიჰამ ლავროვს სამხედრო დამნაშავე უწოდა, იუწყება Reuters-ი.

სიკორსკიმ, სიბიჰამ და დისკუსიის სხვა მონაწილეებმა სხდომათა დარბაზი დატოვეს ლავროვის გამოსვლის წინ, როგორც ეს ხშირად ხდება ხოლმე საერთაშორისო შეხვედრებზე. თავად სერგეი ლავროვი გასული იყო, როდესაც სიტყვით გამოვიდა აშშ-ის სახელმწიფო მდივანი ენტონი ბლინკენი.

მიმდინარე მოგზაურობა სერგეი ლავროვის პირველი ვიზიტია ევროკავშირის ქვეყანაში მას შემდეგ, რაც რუსეთმა 2022 წლის თებერვალში უკრაინაში სრულმასშტაბიანი სამხედრო შეჭრა დაიწყო.

მოსკოვმა არაერთხელ დაადანაშაულა დასავლეთი უკრაინის ომის გამომწვევ მიზეზებში. ვალეტაში უსაფრთხოებისა და თანამშრომლობის ორგანიზაციის შეხვედრაზე სიტყვით გამოსვლისას სერგეი ლავროვმა ეუთოს უწოდა „შეერთებული შტატებისადმი ევროპის დაქვემდებარების კურსის მსხვერპლი“. „ნატო და ევროპა არ არის საკმარისი ვაშინგტონისთვის, მან მთლიანად დაიმორჩილა ევროკავშირიც და ეუთოს სამდივნოც“, - განაცხადა რუსეთის საგარეო საქმეთა სამინისტროს ხელმძღვანელმა.

სერგეი ლავროვი, რომელსაც უკრაინის წინააღმდეგ ომის გამო ევროკავშირის სანქციები აქვს დაწესებული, მალტის დედაქალაქში 4 დეკემბერს ღამით ჩავიდა. როგორც რუსეთის საგარეო საქმეთა სამინისტროს წარმომადგენელმა მარია ზახაროვამ განაცხადა, რომელზეც ასევე ვრცელდება სანქციები, უწყების ხელმძღვანელი ვალეტაში განიხილავს „ეუთოში არსებულ მდგომარეობას და ორგანიზაციის კრიზისიდან გამოყვანის გზებს“.

როგორც სააგენტო DPA აღნიშნავს, ლავროვმა რუსული თვითმფრინავით იმგზავრა მიუხედავად იმისა, რომ რუსეთის ავიაციას ეკრძალება ევროკავშირის საჰაერო სივრცეში შესვლა.

მარია ზახაროვას ვიზა ჯერ გამონაკლისის სახით დაუშვეს, შემდეგ კი გააუქმეს.

იმის თაობაზე, რომ სერგეი ლავროვი მალტაში ჩავიდა და მარია ზახაროვამ საბოლოოდ უარი მიიღო, BBC აღნიშნავს, რომ სანქციები რეგულირდება ევროპის საბჭოს რეზოლუციით, რომელიც მიღებულია ჯერ კიდევ 2014 წელს ყირიმის ანექსიის შემდეგ. ხოლო, მისი თქმით, ევროკავშირში ჩასვლის შესაძლებლობას თეორიულად, სხვა პირებისგან განსხვავებით, ინარჩუნებენ რუსეთის პრეზიდენტი და საგარეო საქმეთა მინისტრი.

შარშან ეუთოს შეხვედრა გაიმართა ჩრდილოეთ მაკედონიაში, რომელიც არ არის ევროკავშირის წევრი, ამიტომ სერგეი ლავროვმა შეძლო იქ წასვლა. 2022 წელს შეხვედრა ვარშავაში გაიმართა და პოლონეთმა რუსეთის მინისტრის მიწვევაზე უარი თქვა. იმ დროისთვის ლავროვზე უკვე ევროკავშირის სანქციები ვრცელდებოდა ომის გამო, აღნიშნავს BBC.