ლამპარდმა შესაძლოა პრემიერ ლიგის კლუბი კვლავ ჩაიბაროს

ინგლისის ჩემპიონშიპში მოასპარეზე „ქოვენთრის“ მთავარი მწვრთნელი ფრენკ ლამპარდი შეიძლება მალე ელიტარულ დივიზიონს დაუბრუნდეს. როგორც Football Insider იუწყება, მისი კანდიდატურა „ვესტ ჰემის“ ხელმძღვანელობის ყურადღების ცენტრში მოექცა.

ლონდონურ კლუბში ამჟამად გრემ პოტერი მუშაობს, თუმცა „ჩაქუჩების“ ბოსები უკმაყოფილო არიან შედეგებით და თუ სიტუაცია უახლოეს კვირებში არ შეიცვალა, სპეციალისტის გათავისუფლების შესაძლებლობა საკმაოდ რეალურია. სწორედ ასეთ შემთხვევაში ერთ-ერთ მთავარ ფავორიტად ლამპარდი განიხილება, რომელიც უკვე იყო „ვესტ ჰემის“ მოთამაშე და კარგად იცნობს კლუბის გარემოს.

ლამპარდისთვის „ქოვენთრიში“ საქმეები სასიამოვნოდ ვითარდება. გასულ სეზონში გუნდი პრემიერ ლიგაში გადასვლას სულ მცირე ნაბიჯით ჩამორჩა, მიმდინარე ჩემპიონატში კი 4 ტურის შემდეგ 8 ქულა აქვს მოპოვებული და მე-5 პოზიციას იკავებს.

მიუხედავად იმისა, რომ ინგლისელი სპეციალისტის კარიერა მწვრთნელად ყოველთვის თანმიმდევრული წარმატებით არ გამოირჩეოდა, მის მიმართ ინტერესი ისევ მაღალია და შესაძლებელია, რომ უახლოეს პერიოდში პრემიერ ლიგის ერთ-ერთი კლუბის სათავეში კვლავ ვიხილოთ.