ლიონი ფინანსური კრიზის გამო მიქაუტაძის გაყიდვას განიხილავს

„ლიონის“ ფორვარდი გიორგი მიქაუტაძე სატრანსფერო ფანჯრის დახურვამდე სხვა კლუბში გადაბარგებას განიხილავს. ფრანგული გამოცემა L’Equipe იტყობინება, რომ ფეხბურთელთან დაკავშირებული მოლაპარაკება უახლოეს დღეებში „ვილიარეალსა“ და „ლიონის“ წარმომადგენლებს შორის მონაკოში შედგება.

გავრცელებული ინფორმაციით, მიქაუტაძის შეძენით დაინტერესებულია ასევე ინგლისური „ბარნლი“, ასტონ ვილა და საუდის არაბეთის ერთი კლუბი. „ლიონი“ მზად არის თავდამსხმელის გაყიდვიდან დაახლოებით 35 მილიონი ევრო მიიღოს, რაც კლუბისთვის მნიშვნელოვანი ფინანსური მოთხოვნების შესრულების თვალსაზრისითაა აუცილებელი.

შეგახსენებთ, რომ მიქაუტაძეს „ლიონთან“ კონტრაქტი 2028 წლის ზაფხულამდე აკავშირებს. მიმდინარე სეზონში მან ორ მატჩში 1 გოლი გაიტანა, გასულ სეზონში კი 47 შეხვედრაში 17 გოლი და 11 საგოლე პასი გაიფორმა.

გავრცელებული ინფორმაციის თანახმად, მოლაპარაკებებში დაწინაურებული ვილიარეალი და ასტონ ვილა არიან.