მედალი საქართველოს! - გელა ბოლქვაძე მსოფლიო ჩემპიონატის ფინალში გავიდა

ხორვატიის დედაქალაქ ზაგრებში მიმდინარე ბერძნულ-რომაული სტილით ჭიდაობის მსოფლიო ჩემპიონატზე საქართველოს ნაკრებს ფინალში კიდევ ერთი წარმომადგენელი ჰყავს. 82 კგ წონით კატეგორიაში მოჭიდავე გელა ბოლქვაძე ოქროს მედლისთვის იბრძოლებს.

ბოლქვაძემ ნახევარფინალში იაპონელი იოშიდა დაძაბულ და უხვქულიან ბრძოლაში 8:5 დაამარცხა. ქართველი ფალავანი სტარტიდანვე თავდაჯერებულად გამოიყურებოდა, აქტიურად უტევდა და მეტოქეს ინიციატივას არ უთმობდა. საბოლოოდ, მძლავრი იერიშების სერია გამარჯვებაში და ფინალის საგზურში გადაიზარდა.

ეს წარმატება განსაკუთრებულად მნიშვნელოვანია საქართველოსთვის, რადგან ბოლქვაძე იქნება მეორე ქართველი, ვინც ფინალურ ბლოკში იასპარეზებს. 18 წლის ვახტანგ ლოლუა (55 კგ) უკვე ისტორიაში შევიდა, როგორც ტურნირის ერთ-ერთი უმცროსი ფინალისტი, და ხვალ ისიც ოქროს მედლისთვის იბრძოლებს.

აღსანიშნავია, რომ ცოტა ხნის წინ ზაგრებში დასრულდა თავისუფალი სტილით ჭიდაობის მსოფლიო ჩემპიონატიც, სადაც ქართველმა მოჭიდავეებმა სამწუხაროდ მედლის მოპოვება ვერ მოახერხეს. ახლა კი ბერძნულ-რომაულ სტილში ჩვენი გუნდი ცდილობს დაკარგული წარმატება ანაზღაუროს და სამშობლოში მედლები ჩამოიტანოს.