მეფარიშვილისა და ოკრიბელაშვილის ადვოკატები შეწყალების თხოვნით ყაველაშვილს მიმართავენ

ახალგაზრდები მსჯავრდებულად ითვლებიან დღეს, 20 იანვარს თბილისის საქალაქო სასამართლში გაფორმებული საპროცესო შეთანხმების შემდეგ, რის დაფუძველზეც ისინი საპატიმროს 10 თვის შემდეგ დატოვებენ.

„ჩვენ შესაძლებლობა გვაქვს მივმართოტ მოქმედ პრეზიდენტს [მიხეილ ყაველაშვილს] შეწყალების თხოვნით. სავარაუდოდ, ორ კვირაში მოსამართლე ნათია გუდაძე დასაბუთებულ განაჩენს ჩაგვაბარებს, რასაც წარვადგენთ პრეზიდენტის ადმინისტრაციაში. იმედს ვიტოვებთ, რომ ახალი პრეზიდენტი ამ ბავშვებს საპატიმროში არ დატოვებს, შეიწყალებს და ისინი ოჯახებს დაუბრუნდებიან“, - უთხრა ჟურნალისტებს საბა მეფარიშვილის ადვოკატმა დავით გამყრელიძემ.

20 იანვარს სასამართლო სხდომაზე ომარ ოკრიბელაშვილმა და საბა მეფარიშვილმა აღიარეს მათ მიმართ წაყენებული ბრალი. პროკურატურა მათ 400-ლარიანი ჯებირის ჯგუფურად დაზიანებას ედავებოდა. როგორც საქმის პროკურორმა ნუგზარ ჭიტაძემ თქვა, ბრალდებულებმა აანაზღაურეს ეს ზიანიც. საპროცესო შეთანხმების საკითხი 13 იანვრის სხდომაზე გაჟღერდა.

საპროცესო შეთანხმების მიხედვით, ომარ ოკრიბელაშვილი და საბა მეფარიშვილი წარდგენილ ბრალდებაში დამნაშავედ იქნენ ცნობილი. მათ სასჯელის სახედ 3 წელი განესაზღვრათ, თუმცა 2024 წლის 17 სექტემბრის ამნისტიის შედეგად, მათ ეს სასჯელი 2,6 წელი გაუხდათ. აქედან მსჯავრდადებულებს 1,6 წელი რეალური სასჯელის მოხდა მოუწევთ, 1 წელი კი პირობითი სასჯელი განესაზღვრათ, შესაბამისად ორივე მათგანი პენიტენციურ დაწესებულებაში კიდევ 10 თვეს გაატარებს.