მზია ამაღლობელი შიმშილობს

ონლაინგამოცემების, „ბათუმელებისა“ და „ნეტგაზეთის“ დამფუძნებელი და დირექტორი მზია ამაღლობელი საპატიმროში საკვებს არ იღებს. პატიმრობაში მყოფი მედიამენეჯერის შესახებ არასამთავრობო ორგანიზაცია „ახალგაზრდა იურისტთა ასოციაციაში“ ("საია") გამართულ ბრიფინგზე ილაპარაკეს.

„მას შემდეგ, რაც იმყოფება მეხუთე დაწესებულებაში, ის არ იღებს საკვებს. ამის შესახებ ინფორმირებულია ადმინისტრაცია. ეს არის მისი პროტესტის ფორმა“, - თქვა ნონა ქურდოვანიძემ, "საიას" თავმჯდომარემ.

„ნეტგაზეთმა“ გაავრცელა მზია ამაღლობელის წერილი, რომელიც მან სასჯელაღსრულების დაწესებულებიდან გამოაგზავნა. მასში საუბარია საპროტესტოდ გამოცხადებულ შიმშილობაზეც:

„ვშიმშილობ. სიცოცხლეზე ღირებული თავისუფლებაა. ჩემს მოცემულობაში ნებისმიერი ის მოქალაქე შეიძლება აღმოჩნდეს, ვისაც დემოკრატიულ, სამართლიან, ევროპულ, რუსული გავლენებისგან თავისუფალ საქართველოში უნდა ცხოვრება.

იბრძოლეთ, სანამ გვიანი არ არის. იბრძოლეთ ყველგან, სადაც არ უნდა იყოთ, ქვეყანაში თუ ქვეყნის გარეთ, სოფელსა თუ ქალაქში, ქუჩებსა თუ აუდიტორებში, საზოგადოებრივ და სამუშაო სივრცეებში. იყავით მამაცები, გაუფრთხილდით და გააძლიერეთ ერთმანეთი. არ დაუშვათ საქართველოს იზოლირება ცივილიზებული სამყაროსგან“, - წერია მზია ამაღლობელის წერილში.