მოსამართლემ შეაჩერა ტრამპის განკარგულება დაბადებით მოქალაქეობის უფლების შეზღუდვის შესახებ – „არაკონსტიტუციურია!“

სიეტლის ფედერალურმა მოსამართლემ შეაჩერა აშშ-ის პრეზიდენტის, დონალდ ტრამპის აღმასრულებელი განკარგულება, რომლის მიხედვითაც, შეერთებულ შტატებში დაბადებული უცხოელთა ბავშვები მოქალაქეობას ავტომატურად ვეღარ მიიღებენ.

განკარგულება, რომელსაც ტრამპმა 20 იანვარს, ინაუგურაციის დღეს მოაწერა ხელი, ახალ ინტერპრეტაციას იძლევა კონსტიტუციური დებულებისა, რომლის მიხედვითაც ყველა ბავშვი, რომელიც აშშ-ის ტერიტორიაზე დაიბადება, ავტომატურად ხდება ამ ქვეყნის მოქალაქე. ტრამპის ადმინისტრაცია მიიჩნევს, რომ ეს ნორმა არ უნდა ეხებოდეს იმ უცხოელთა შვილებს, რომლებიც აშშ-ში იმყოფებიან უკანონოდ, ან თუნდაც კანონიერად, მაგრამ შეზღუდული ვადით.

როდესაც იუსტიციის სამინისტროს წარმომადგენელმა ადმინისტრაციის პოზიციის ახსნა დაიწყო, მოსამართლემ შეაწყვეტინა და პირდაპირ ჰკითხა: „არის თუ არა კონსტიტუციური ეს ბრძანებულება?“ ადმინისტრაციის იურისტი პასუხის გაცემას შეეცადა, თუმცა მოსამართლემ ისევ გააწყვეტინა: „ეს აშკარად ანტიკონსტიტუციური ბრძანებულებაა“.

„გულახდილად რომ ვთქვა, იმის გაგებაც კი მიჭირს, როგორ შეუძლია პროფესიონალ იურისტს ასე ერთმნიშვნელოვნად ამტკიცოს, რომ ეს განკარგულება კონსტიტუციურია“, – დასძინა კოფენურმა.

ტრამპის აღმასრულებელი განკარგულება 19 თებერვალს უნდა შევიდეს ძალაში და გავრცელდეს იმ ბავშვებზე, რომლებიც ამ დღეს და შემდგომში დაიბადებიან. მოსამართლემ მისი მოქმედება 14 დღით შეაჩერა მომავალ სასამართლო სხდომებამდე.

აშშ-ის ახალ ადმინისტრაციას შესაძლებლობა ექნება, ეს გადაწყვეტილება უფრო მაღალი ინსტანციის სასამართლოებში გაასაჩივროს, უზენაესი სასამართლოს ჩათვლით. ტრამპმა განაცხადა, რომ ამ შესაძლებლობას გამოიყენებს.

ნანა ძნელაძე

ტრამპი ამერიკას „ოქროს ხანას“ ჰპირდება – 47-ე პრეზიდენტმა ფიცი დადო (ვიდეო)