მოსკოვი, ნავთობის ბაზა სტავროპოლის მხარეში - რუსეთზე დრონებით შეტევა იყო

რუსეთის სტავროპოლის მხარის გუბერნატორ ვლადიმირ ვლადიმიროვის ტელეგრამ-არხზე 13 ივლისს გამთენიისას გამოქვეყნებული ცნობით, დრონებით შეტევის შედეგად ხანძარი გაჩნდა დასახლება ვიაზნიკიში მდებარე სამრეწველო ზონის ტერიტორიაზე. გუბერნატორს არ დაუკონკრეტებია, რომელი ობიექტი იწვის.

დამოუკიდებელი რუსული გამოცემის, ASTRA-ს ცნობით, დრონებით დარტყმა იყო ნავთობის ბაზაზე, რომელიც რკინიგზის მახლობლად მდებარეობს. მისგან 1,2 კილომეტრშია კიდევ ერთი ნავთობის ბაზა, რომელსაც უკრაინის ძალებმა 9 ივლისს დაარტყეს.

აფეთქებები იყო მოსკოვის შემოგარენში. მოსკოვის მერის, სერგეი სობიანინის ტელეგრამ-არხზე შუაღამიდან დილის ექვს საათამდე გამოქვეყნებული მოკლე ცნობების მიხედვით, საერთო ჯამში მოიგერიეს მოსკოვისკენ მიმავალი 40-მდე დრონი და „ნამსხვრევების ჩამოცვენის ადგილებში მუშაობენ საგანგებო სამსახურების სპეციალისტები“. სობიანინს არც კონკრეტული ადგილები დაუსახელებია და არც შედეგები.

ASTRA-ს ცნობით, ერთ-ერთი დრონი სახლს მოხვდა მოსკოვის ოლქის ქალაქ სოლნეჩნოგორსკში.

13 ივლისს დილით მოსკოვის ოლქის გუბერნატორმა განაცხადა, რომ დრონებით შეტევის შედეგად რეგიონში სამი ადამიანი დაიღუპა და ხუთი დაშავდა.